18-iyun kuni kamida 882 nafar noqonuniy migrant La-Mansh orqali Buyuk Britaniyaga o‘tgan. Sky News Buyuk Britaniya Ichki ishlar vazirligiga tayanib xabar berishicha, bu yil boshidan buyon bir sutkada mamlakatga kelgan migrantlarning eng yirik oqimidir.
Bu joriy yildagi avvalgi antirekorddan 171 kishiga ko‘p va 2022-yil 29-noyabrda Britaniya qirg‘oqlariga noqonuniy yetib kelgan 947 nafar noqonuniy migrantlar oqimidan keyin ikkinchi o‘rinda turadi.
Bu safar Britaniya IIV maʼlumotlariga ko‘ra, muhojirlar 15 ta puflama qayiqdan foydalangan, yaʼni ularning har birida o‘rtacha 59 kishi bo‘lgan.
Yil boshidan beri La-Manshni noqonuniy kesib o‘tganlar soni 12 313 nafarga yetdi, bu o‘tgan yilning shu davriga nisbatan 18 foizga ko‘p.
La-Mansh orqali puflanuvchi qayiqlarda Angliya qirg‘oqlariga yetib borgan migrantlar soni so‘nggi yillarda muttasil ortib bormoqda. Konservativ partiyaning noqonuniy migratsiyaga qarshi kurash bo‘yicha va’dalariga qaramay, 2018-yildan buyon jami 110 mingdan ortiq noqonuniy migrant La-Mansh bo‘ylab Buyuk Britaniyaga o‘tgan.
Murojaatlarni ko‘rib chiqish davrida noqonuniy migrantlar odatda maxsus markazlarga joylashtiriladi, biroq bu markazlarning soni yetarli emas. Bunday migrantlarni saqlash, The Times gazetasiga ko‘ra, Britaniya soliq to‘lovchilariga yiliga taxminan 4 milliard funt sterling (5,1 milliard dollar) tushadi. Xususan, mehmonxonalarda noqonuniy migrantlarni joylashtirish uchun kuniga taxminan 6 million funt (7,7 million dollar) sarflanadi.
Izoh (0)