Gollivudning kuchli kinematograflari filmlarida ishtirok etishni istaydigan aktyorlar juda ko‘p. Ular loyihaga qabul qilinishdan avval bir necha bosqichdan iborat kastingdan o‘tadi. Ammo mashhur aktyor bo‘lishiga qaramay, ma’lum obraz uchun tanlovda o‘zining iste’dodini yetarlicha ko‘rsata olmagan yulduzlar ham bor. Quyida ommabop filmlar uchun o‘tkazilgan kastingdan yiqilgan yulduzlarni ko‘rib chiqamiz.
Tom Holland — “Yulduzlar jangi: kuchning uyg‘onishi” (2015)
Tom Holland “Yulduzlar jangi” sikvelining trilogiyasida Fin rolini o‘ynashga da’vogar edi. Lekin aktyor kastingdan o‘ta olmadi, chunki obrazga kirgan vaqtda kulgidan o‘zini tiya olmagan edi.
“Men to‘rt-beshta tinglovdan o‘tdim. Esimda, droidni o‘ynayotgan bir ayol bilan sahnada suratga tushayotgan edik. Men: “Biz kemaga qaytishimiz kerak!” deb qichqirdim. U esa javoban: “Bip, bip, bip, bip” deya takrorlar edi. Droid obrazining bunday qiliqlaridan kulib yuborar edim. Hozir voqeani eslasam, uyalib ketaman”, — deydi aktyor.
Oxir-oqibat rejissyor Jon Boyegani Fin sifatida tanlab oldi.
Endryu Garfild — “Narniya yilnomalari: shahzoda Kaspian” (2008)
Aktyor Endryu Garfild “Narniya yilnomalari”ning ikkinchi qismida shahzoda Kaspian obrazini gavdalantirishni juda istar edi. Tinglovdan o‘ta olmaganini eshitgach, aktyor bundan qattiq ranjidi va agentidan buning sababini bilib berishini so‘radi. Ma’lum bo‘lishicha, rejissyor Garfildni yetarlicha kelishgan erkak deb hisoblamas ekan. Kaspian roli Ben Barnsga nasib qildi.
“Ben juda chiroyli va iqtidorli yigit. Shunday ekan, rejissyorning bu qaroridan norozi emasman. Menimcha, u o‘z ishini a’lo darajada bajardi”, — dedi Garfild.
Kichik Freddi Prints — “O‘rgimchak odam” (2002)
Freddi Printsda katta ekranda namoyish etilgan eng birinchi o‘rgimchak odam bo‘lish imkoniyati yuqori edi, ammo aktyor uni qo‘ldan boy berdi. Bunga film rejissyori Sem Reymi bilan uchrashuvdagi suhbat sabab bo‘ldi.
“Rejissyor oldida juda hayajonda, biroz asabiy edim. Sem mendan o‘rgimchak odamni nima uchun yaxshi ko‘rishimni aytib berishimni so‘radi. Men esa o‘zga sayyoralik simbiot Venom haqida so‘zlay boshladim. Uchrashuvni tark etar ekanman, o‘rgimchak odam o‘rniga Venom haqida 25 daqiqa aytib berganim yodimga tushdi. Qanday ahmoqlik! O‘sha kecha men o‘zimdan qattiq xafa va g‘azablangan holda uyga qaytdim”, — dedi Freddi.
O‘rgimchak kostyumi oxir-oqibat aktyor Tobi Maguayrga topshirildi.
Zoi Kravits — “Qora ritsar: afsonaning qayta tug‘ilishi” (2012)
Aktrisa Zoi Kravitsning ta’kidlashicha, unga rejissyor Kristofer Nolanning “Betmen” trilogiyasi uchinchi qismi kastingida qatnashishga yo‘l qo‘yishmagan. Bunga uning irqi sabab bo‘lgan.
“Bu fikr aynan Kristofer Nolanga tegishlimi yoki yo‘q — menga qorong‘i. Balki bunday irqchilik qaysidir kasting direktori yoki uning yordamchisining fikridir. O‘sha vaqtda meni “too urban” (evfemizm, qora tanli degan ma’noni bildiradi) deb atashgan. Meni ssenariyni ham o‘qiy olmasa kerak, deyishganda qattiq xafa bo‘lganman”, — deya eslaydi aktrisa.
Keyinroq Zoi Mett Rivzning “Betmen” (2022) filmida Mushuk ayol rolini o‘ynagan.
Brenda Song — “O‘ta badavlat osiyoliklar” (2018)
Makoley Kalkinning qallig‘i Brenda Songning aytishicha, uning tashqi ko‘rinishi to‘liq osiyoliklarga o‘xshamagani uchun “O‘ta badavlat osiyoliklar” romantik komediyasida suratga tusha olmagan.
“Bu voqea mening yuragimni sindirdi. E’tibor bering, film qahramoni 20 yoshda, u aslida osiyolik bo‘lgan Amerika fuqarosi. Qanday qilib bunday rolga to‘g‘ri kelmasligim mumkin?” — deya taajublanadi aktrisa.
Robert Redford — “Bitiruvchi” (1967)
Robert Redford “Bitiruvchi” filmida Benjamin Breddok obrazini gavdalantirishni orzu qilgan. Biroq mazkur film rejissyori Mayk Nikols fikricha, Robertdek kelishgan va o‘ziga ishongan aktyor muvaffaqiyatsiz, hayotda o‘z o‘rnini topa olmagan yigit rolini o‘ynay olmas edi. Mazkur rol aktyor Dastin Hoffmanga topshirildi.
Izoh (0)