AQSh prezidentining milliy xavfsizlik bo‘yicha maslahatchisi Jeyk Sallivan yaqinda Rossiya prezidenti Vladimir Putin tomonidan Ukraina bo‘yicha taklif qilingan tashabbusga izoh berdi. Uning so‘zlariga ko‘ra, Rossiya prezidentining taklifi BMT Nizomi, axloq va sog‘lom fikrga ziddir.
“Hech bir mas'uliyatli davlat buni tinchlik uchun asos deb ayta olmaydi. Bu BMT Nizomi, axloq va sog‘lom fikrga ziddir”, — dedi u Shveysariyada bo‘lib o‘tgan Ukraina bo‘yicha tinchlik sammiti chog‘ida.
Sallivanga ko'ra, Vladimir Putinning taklifi Ukrainaning o'z suveren hududlaridan voz kechishni nazarda tutadi.
14-iyun kuni Vladimir Putin Ukrainadagi mojaroni tugatish bo‘yicha bir qancha shartlarni ilgari surdi:
- Ukraina qo'shinlarini Lugansk va Donetskdan, shuningdek, Xerson va Zaporojye viloyatlaridan olib chiqib ketish;
- Ukrainaning NATOga a'zo bo'lishdan bosh tortishi;
- Ukraina uchun yadrosiz va neytral maqom;
- Rossiyaga qarshi sanksiyalarni bekor qilish;
- Qrim va Sevastopol, Donetsk va Lugansk, Zaporojye va Xerson viloyatlarining Rossiya Federatsiyasining hududlari sifatidagi maqomini xalqaro hujjatlarda belgilash.
Ukraina prezidenti Vladimir Zelenskiy Putinning takliflarini ultimatum deb atadi va Ukraina ularga ishonolmasligini aytdi.
Izoh (0)