Boeing va Airbus kompaniyalarining ba’zi samolyotlari soxta muvofiqlik sertifikatiga ega bo‘lgan titan komponentlari bilan jihozlangan. Bu haqda New York Times xabar berdi.
Ta’kidlanishicha, Qo‘shma Shtatlarda buning parvozlar xavfsizligi uchun oqibatlari va bunday qismlarga ega samolyotlar sonini aniqlash uchun tergov boshlangan. Hujjatlarni qalbakilashtirish ishi bo‘yicha tergovni AQSH Federal aviatsiya ma’muriyati (FAA) va Boeing uchun fyuzelyajlar, shuningdek, Airbus qanotlarini yetkazib beruvchi Spirit AeroSystems kompaniyasi olib bormoqda.
Nashrning qayd etishicha, ta’minotchi kompaniya metallda korroziya oqibatida kelib chiqqan mayda teshiklarni aniqlaganidan keyin surishtiruv boshlangan. Vaziyatdan xabardor manbalarga ko‘ra, titan sotuvchi Xitoy kompaniyasining xodimi sertifikatlarni soxtalashtirgan va material ishonchli ta’minotchidan olinganini bildirgan.
FAA bayonotida aytilishicha, muammo ko‘lami o‘rganilmoqda va bunday qismlardan foydalanish samolyotlarning qisqa va uzoq muddatli xavfsizligiga ta’siri qanday bo‘lishi aniqlanmoqda. Qancha samolyotda shubhali materiallardan tayyorlangan qismlar borligi aniq emas.
Avvalroq Boeing issiqlik almashtirgich muammosidan tashqari, yo‘lovchilar kabinasi uchun o‘rindiqlarni ishlab chiqarishda ham qiyinchiliklar mavjudligini bildirgan. Yetkazib beruvchilar, ayniqsa, biznes-klassdagi o‘rindiqlarga bo‘lgan talabni moddiy taqchilligi va sertifikatlash kechikishi tufayli qondira olmagan.
Izoh (0)