Shavkat Mirziyoyev va Yun Sok Yol kengaytirilgan tarkibda muzokara o‘tkazgani to‘g‘risida xabar berilgandi. Muzokaralar davomida prezidentlar madaniy-gumanitar almashinuvni yanada kengaytirishga alohida eʼtibor qaratdi.
Samarali sheriklikning yaqqol misoli Janubiy Koreya tomoni bilan hamkorlikda qurilgan zamonaviy ko‘p tarmoqli bolalar klinikasi hisoblanadi.
Muzokaralar chog‘ida kattalar uchun shifoxona va onkologik klinikani o‘z ichiga olgan tibbiy klaster loyihalarini tayyorlash va amalga oshirishni jadallashtirish bo‘yicha kelishuvga erishildi.
Bundan tashqari, Koreyaning ixtisoslashtirilgan markazlarida tibbiyot xodimlarining malakasini oshirish bo‘yicha uzoq muddatli dastur ishga tushiriladi.
Taʼlim sohasida hamkorlik bo‘yicha katta tajriba to‘plangan. O‘tgan yilning martida birinchi O‘zbekiston—Janubiy Koreya rektorlari forumi bo‘lib o‘tdi. Kelgusi yili navbatdagi uchrashuv o‘tkaziladi. O‘zbekistonda Koreya fan va texnologiyalari instituti (KAIST) modeli asosida institut tashkil etish taklifi qo‘llab-quvvatlandi.
Bundan tashqari, Koreya Davlat boshqaruvi instituti va Milliy inson resurslari instituti bilan hamkorlikda Toshkentdagi Davlat boshqaruvi akademiyasi qoshida Raqamli texnologiyalar va sunʼiy intellekt o‘quv markazini ochish rejalashtirilgan.
Koreyalik mutaxassislarni jalb qilgan holda koreys tilini o‘rganish dasturlarini kengaytirishga alohida eʼtibor qaratildi.
KOICA ko‘magida Toshkent, Samarqand, Shahrisabz, Farg‘ona va Urganchda ochilgan professional taʼlim markazlarida o‘zbekistonlik fuqarolar muvaffaqiyatli tayyorlanayotgani qayd etildi. Janubiy Koreya tomoni moliyaviy-texnik ko‘makni jalb qilgan holda bunday markazlar tarmog‘ini O‘zbekistonning boshqa hududlarida ham ochishga tayyorligini bildirdi.
Ikki xalqni yanada yaqinlashtirish maqsadida kelgusi yilni “O‘zbekiston va Koreya o‘rtasidagi o‘zaro almashinuvlar yili” deb eʼlon qilish va o‘zaro madaniy tadbirlarni o‘tkazish taklif qilindi.
Bundan tashqari, 2027-yilda O‘zbekistonda koreys diasporasi istiqomat qilayotganining 90 yilligi keng nishonlanadi. Prezidentlar bu tarixiy sanaga atab Toshkent shahridagi Koreys madaniyati va sanʼati uyida muzey va kutubxona ochishga kelishib oldi.
Shavkat Mirziyoyev “Elektron hukumat”ni rivojlantirishda, “Raqamli O‘zbekiston” strategiyasini ishlab chiqishda, IT-park salohiyatini mustahkamlashda va U-Enter biznes inkubatorlarini yaratishda Koreya tomonining katta hissasini qayd etdi. Bu borada tomonlar sunʼiy intellekt, biznes jarayonlarini autsorsing qilish va raqamli texnologiyalar sohasida hamkorlikni kengaytirishga kelishib oldi.
Shuningdek, korrupsiyaga qarshi kurashish, ekologiya, mehnat migratsiyasi va boshqa muhim yo‘nalishlarda aniq takliflar ko‘rib chiqildi. Muzokaralar yakunida davlat rahbarlari har bir yo‘nalish bo‘yicha aniq muddatlar va amalga oshirish mexanizmlari belgilangan “yo‘l xaritalari”ni qabul qilishga topshiriq berdi.
Avvalroq Ko‘ksaroy qarorgohida Shavkat Mirziyoyev va Janubiy Koreya prezidenti Yun Sok Yolning tor doiradagi uchrashuvi bo‘lib o‘tgani to‘g‘risida xabar berilgandi.
Izoh (0)