Urgut, Qo‘shko‘pir, Yangihayot hamda Namangan tumanlarida qalbaki aksiz markali alkogol va tamaki mahsulotlarini muomalaga kiritilishining oldi olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, departamentning Urgut tuman bo‘limi tomonidan o‘tkazilgan tezkor tadbirda “H.O.” MCHJga qarashli savdo do‘koni rahbari S.V. hech qanday hujjatsiz jami 80 dona “Vodka russkaya” nomli qalbaki aksiz markali alkogol mahsulotini fuqaro A.A.ga 1,6 mln so‘mga sotgan vaqtida ushlanib, ushbu do‘kondan umumiy qiymati 123 mln so‘mlik qalbaki aksiz markali 26 turdagi jami 4 425 dona alkogol hamda 12 turdagi 166 quti tamaki mahsuloti ashyoviy dalil sifatida olingan.
Shu kabi departamentning Qo‘shko‘pir tuman bo‘limi tomonidan o‘tkazilgan tezkor tadbirda “A.D.” MCHJ rahbari X.S. Urganch shahridagi savdo shoxobchasida hech qanday hujjatsiz umumiy qiymati 71,6 mln so‘mlik 97 turdagi jami 150 ta qalbaki aksiz markali alkogol mahsulotini sotuvga qo‘yganligi aniqlanib, ushbu mahsulotlar ashyoviy dalil sifatida olingan.
Departamentning Yangihayot tuman bo‘limi tomonidan o‘tkazilgan tezkor tadbirda “Navqiron” MFY hududida tamaki mahsulotlari savdosi bilan shug‘ullanib kelgan K.E. va S.D. xaridor A.Z.ga “Esse Change” nomli aksiz markasiz tamaki mahsulotini sotgan vaqtlarida ushlanib, ularning yonidan 141 turdagi 905 quti aksiz markasiz tamaki mahsuloti ashyoviy dalil sifatida olingan.
Departamentning Namangan tuman bo‘limi tomonidan o‘tkazilgan tezkor tadbirda “M.2.” MCHJga tegishli savdo do‘koni sotuvchisi A.K. hech qanday hujjatsiz 5 dona qalbaki aksiz markali alkogol mahsulotini fuqaro A.B.ga sotgan vaqtida ushlanib, ushbu do‘kondan 19 turdagi jami 269 dona qalbaki aksiz markali alkogol mahsuloti ashyoviy dalil sifatida olingan.
Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)