O‘zbekistonda “qonundagi o‘g‘ri — Baxti Tashkenskiy” maqomini olgan Baxtiyor Qudratullayev va 36 nafar ayblanuvchi bo‘yicha davom etayotgan sud majlisida jurnalistlarga video hamda audioma’lumotlar olishiga chek qo‘yilgani xabar berilgandi.
Bu haqdagi xabarlarga Sudyalar oliy kengashi axborot xizmati munosabat bildirdi.
B.Qudratullayev (“Baxti Tashkentskiy”) va boshqalarga oid jinoyat ishi ochiq sud majlisida ko‘rib chiqilayotgan bo‘lsa-da, raislik etuvchi tomonidan ommaviy axborot vositalari xodimlariga sud jarayonini videotasvir va audioga olish cheklangani muhokamalarga sabab bo‘lmoqda. Mazkur jinoyat ishi bo‘yicha avvalgi sud majlisidan olingan lavhalar qator ommaviy axborot vositalari va ijtimoiy tarmoqdagi kanallarda turlicha talqinlar bilan e’lon qilingani, natijada jamoatchilikda noto‘g‘ri tasavvurlar shakllanishidan tashqari sudga nisbatan ijtimoiy bosim ehtimolini ham paydo qilmoqda.
Shundan kelib chiqib, raislik etuvchi tomonidan zarur protsessual choralar ko‘rilishi mutlaqo tabiiy, Qonun bunga izn beradi (O‘zR JPK, 408-modda). Qolaversa, bunday tartib xalqaro amaliyotda ham ko‘plab kuzatiladi, — deyiladi rasmiylar izohida.
Qo‘shimcha qilinishicha, sudyaning bu harakati sud jarayonini umuman yoritmaslik kerak degan mazmunni bermaydi.
Sudning mazkur ajrimi sud majlisida jurnalist va blogerlarning ishtirokini uzil-kesil taqiqlamaydi. Ya’ni, ular jarayonni bevosita kuzatishi, o‘zlari uchun zarur qaydlar qilib borishi hamda turli bashorat va taxminlarga berilmagan holda axborotlar e’lon qilishiga mone’lik yo‘q, — deydi mas’ullar.
Izoh (0)