O‘zbekistonda ro‘yxatdan o‘tgan abituriyentlar joriy yil bitiruvchisi sifatida qayd etilayotgani to‘g‘risida maʼlumotlar tarqaldi. Bilimni baholash agentligi haqiqatdan ham shunday holat kuzatilganini ma’lum qildi.
Oliy va professional taʼlim muassasalariga abituriyentlarni ro‘yxatga olish ochilgandan so‘ng dastlab ro‘yxatdan o‘tgan 623 nafar abituriyentda shunday holat kuzatilgan.
Qayd etilishicha, ushbu holat joriy yil bitiruvchilarining maʼlumotlari taʼlim vazirliklaridan real vaqt rejimida olinishi bilan bog‘liq bo‘lib, Oliy taʼlim, fan va innovatsiyalar vazirligining axborot tizimiga so‘rov yuborilganda, barchaga bir xil tarzda 2024-yilda Buxoro davlat universiteti Qorako‘l akademik litseyini tamomlagani to‘g‘risida maʼlumot qaytarilgan.
Mazkur holat agentlik mutaxassislari tomonidan qisqa vaqt ichida aniqlanib, Oliy taʼlim, fan va innovatsiyalar vazirligining mutaxassislariga bog‘langan holda bartaraf etildi.
Maʼlumot uchun, umumtaʼlim maktablarining joriy yil bitiruvchilari to‘g‘risidagi maʼlumotlar Maktabgacha va maktab taʼlimi vazirligi, kasb-hunar maktablari va akademik litseylarning joriy yil bitiruvchilari to‘g‘risidagi maʼlumotlar Oliy taʼlim, fan va innovatsiyalar vazirligining axborot tizimlaridan integratsiya orqali real vaqt rejimida olinadi.
Abituriyentlarni onlayn ro‘yxatga olish my.uzbmb.uz saytining “Oliy va professional ta’lim muassasalariga qabul” bo‘limi orqali amalga oshirilmoqda. U 25-iyungacha (shu kuni ham) davom etadi.
Izoh (0)