“Uzchess Cup”. Nodirbek Abdusattorov va Jahongir Vohidovda g‘alaba, Javohir Sindorov durang o‘ynadi

O‘zbekistonda ilk bor mukofot jamg‘armasi 166 ming AQSH dollarini tashkil etadigan “Uzchess Cup” turniri boshlandi. Ushbu musobaqada FIDE reytingida 2700 dan yuqori reytingga ega Nodirbek Abdusattorov, Richard Rapport, Maghsoodloo Parham, Vidit Gujrathi, Mamedyarov Shakhriyor kabi dunyoga mashhur shaxmatchilar dona surmoqda. 

Turnir uchta guruhda:

• “Masters” guruhi FIDE reytingi 2700 va undan yuqori bo‘lgan shaxmatchilar;
• “Challengers” guruhi FIDE reytingi 2600 va undan yuqori bo‘lgan shaxmatchilar;
• “Futures” guruhi FIDE reytingi 2500 va undan yuqori bo‘lgan shaxmatchilar o‘rtasida o‘tkaziladi.

6-iyun kuni musobaqaning birinchi tur uchrashuvlari bo‘lib o‘tdi. “Masters” guruhida O‘zbekistondan uch nafar shaxmatchi qatnashmoqda. Magssoodloo Parhamga qarshi oq donalarda o‘ynagan dunyoning beshinchi raqamli shaxmatchisi Nodirbek Abdusattorov qiyinchiliksiz raqibini mag‘lub etdi. 

Bu ikki shaxmatchilar o‘rtasidagi so‘nggi uch uchrashuvda o‘zbekistonlik shaxmatchi ustun kelmoqda.

Uchrashuvdan so‘ng Nodirbek Abdusattorov Parham haqida fikr bildirdi.

“Parham bilan bir necha yil oldin, ketma ket oq donalar bilan o‘ynab ham mag‘lub bo‘lgandim. Uning stilini o‘rgandim va hozirda u men uchun qulay raqibga aylandi”

“Masters” guruhida qatnashayotgan Nodirbek Yakubboyev hamda Javohir Sindorov durang o‘ynadi. Javohir Yu Yangyi bilan murosa yo‘lini tanlagan bo‘lsa, Nodirbek tajribali Richard Rapportga mag‘lub bo‘lmadi. 

“Challengers” turnirida qatnashayotgan O‘zbekiston terma jamoasi sardori Jahongir Vohidov g‘alaba qozondi. Shamsiddin Vohidov durang bilan kifoyalandi. 
“Futures” guruhida qatnashayotgan barcha o‘zbekistonlik shaxmatchilar durang qayd etdi.

Birinchi turdan so‘ng “Masters” guruhida Nodirbek Abdusattorov hamda Sarana Aleksey 1 ochko bilan yetakchilik qilmoqda.

“Challengers” guruhida Jahongir Vohidovdan tashqari Abhijeet Gupta va Aleksandar Indjich ham g‘alabaga erishib bir ochko to‘pladi. “Futures” guruhida faqatgina eronlik Bardiya Daneshvarda g‘alaba bor. 

Bugun, 7-iyun kuni musobaqaning ikkinchi tur uchrashuvlari bo‘lib o‘tadi.