5-iyun — Xalqaro yugurish kuni. Hech kimga sir emaski, sport nafaqat tanaga, balki ruhiyatga ham ijobiy ta’sir ko‘rsatadi. Shifokorlar bejizga aynan yugurish bilan shug‘ullanishni tavsiya qilmaydi, chunki u o‘pka, yurak va asab tizimini yaxshilaydi va immunitetni ko‘taradi. Bugungi maqolada har kuni o‘z ustida ishlashga hamda sport bilan shug‘ullanishga undaydigan eng yorqin filmlarni sanab o‘tamiz.
“Forrest Gamp” (1994)
Film aqliy qobiliyatlari qisman cheklangan holda tug‘ilgan bir yigit haqida hikoya qiladi. Forrest Gamp bolaligidan umurtqa pog‘onasidagi muammolar tufayli to‘g‘ri yura olmaydi va maxsus qistirmalar taqib yuradi. Ammo yugurish paytida yigit birdan “sog‘aya boshlaydi”: Forrest bezorilardan qochishga majbur bo‘lganda tanasidagi qistirmalar uzilib ketadi va film qahramoni yordamsiz qaddini tik tutgan holda yuguradi.
“Flesh” (2014)
Serial chaqmoq urganidan keyin super kuchga ega bo‘lgan kriminalchi Barri Allen haqida hikoya qiladi. Endi uning g‘ayritabiiy tezlikda harakatlana olish qobiliyati bor. Qahramonga tabiat in’om etgan ne’mat va kuchni insonlar hayotini saqlab qolish va boshqa ko‘plab ezgu amallar uchun ishlatadi.
“Men ozmoqdaman” (2018)
Film to‘yidan keyin o‘z sog‘lig‘i va tashqi ko‘rinishiga g‘amxo‘rlik qilishni to‘xtatgan Anya ismli qiz haqida hikoya qiladi. Uning juda katta ortiqcha vaznga egaligi turmush o‘rtog‘iga yoqmaydi va erkak unga xiyonat qila boshlaydi. Bunday voqeadan so‘ng ozishga va sog‘lom turmush tarziga rioya qilishga jiddiy kirishadi. Anya xuddi shunday maqsadli yigitni uchratadi va u bilan yugura boshlaydi. Natijada Anya yana asli holatiga — nozik qomatli go‘zal qiz qiyofasiga qaytadi.
“Yugur baqaloq, yugur” (2007)
Film o‘zining homilador qallig‘i Libbiga uylanmoqchi bo‘lgan Dennis Doyl haqida. Afsuski, to‘y arafasida kelajakdagi mas’uliyatdan qo‘rqqan Deyl qochib ketadi. Oradan besh yil o‘tib, u do‘konga qo‘riqchi bo‘lib ishga kiradi va yerto‘ladagi kichkina kvartirani ijaraga oladi. Bu vaqtda Libbi badavlat tadbirkor bilan uchrashib yurar, o‘g‘lining tarbiyasi bilan shug‘ullanar edi. Dennis uni uchratgach, xatosini to‘g‘rilashga harakat qiladi.
“Yugurayotgan odam” (1987)
Arnold Shvarsenegger ishtirokidagi jangovar film syujetiga ko‘ra, televideniyeda “Yugurayotgan odam” shousi berila boshlaydi va TV sanoati rivojlanishining yangi bosqichiga qadam qo‘yadi. Dasturda jinoyatchilar professional sportchilarning qurboni bo‘lishadi. Dastur ishtirokchilari — jinoyatchilar 1996-yilda Los-Anjelesdagi zilziladan vayron bo‘lgan hududlarda ta’qibga uchraydi.
Izoh (0)