Doimiy tirbandliklar, vaqtning tez suratda o‘tib ketishi, shovqinli ko‘chalar... shahardagi hayotdan bir zum dam olib, olis va sokin yerlarga borishni kim ham istamaydi? Bugungi qahramonlarimiz ham Gollivudning osmono‘par binolari va stressga to‘la shaharlaridan qochib, chekka hududlarda qo‘nim topishni maqul ko‘rgan.
Nikki Rid
Nikol Xyuston Rid turmush o‘rtog‘i Iyen Somerholder bilan fermadagi shinam uyiga ko‘chib o‘tishgan. Ular birinchi navbatda farzandlarini internet va ijtimoiy tarmoqlarning haddan tashqari ta’siridan himoya qilishni maqsad qildi. Albatta, tabiat, o‘simlik va hayvonot dunyosida o‘tgan bolalik baxtli va qadrli bo‘ladi.
Yulduzlar oilasi shaxsiy tomorqasida sabzavot va mevalar yetishtiradi, hayvonlarni boqadi. Vaqti-vaqti bilan ijtimoiy kechalarda ishtirok etish uchun shaharga borib turadi.
Metyu Makkonahi
Shahar shovqinidan uzoqda yashagan kishi nafaqat ruhan dam olishi, balki oiladagi munosabatlarni ham saqlab qolishi mumkin. Texasdagi ranchosiga ko‘chishdan avval Metyu Makkonahi va uning rafiqasi, fotomodel Kamila Alves Los-Anjelesda yashagan:
“Malibu shahrida baxtli hayot kechirdik. Mehr bilan qurgan go‘zal uyda farzandlarimizni katta qildik, shinam bog‘imiz ham bor edi”, — dedi Kamila.
Shunga qaramay, uning turmush o‘rtog‘i doim vatanini sog‘inishini bilar edi va munosabatlarini yaxshilash uchun ular bir muddat Texasga ko‘chib o‘tishga qaror qildi. U yerda yulduzlar bir-birini yaxshiroq tushunib, murosaga kela boshlagach, Texasda doimiy qolishga kelishildi.
Bella Hadid
Chavandoz Adan Banuelos bilan uchrashishni boshlagan Bella Hadid uning uyi yaqinidagi fermerlik uyini sotib oldi va shahar chekkasiga ko‘chib o‘tdi. Insayderlarning so‘zlariga ko‘ra, yulduzlar tez-tez bir-birining uyiga tashrif buyuradi va shahar shovqinidan uzoq yerlarda hordiq chiqaradi.
Juliya Roberts
Gollivud aktrisasi Juliya Roberts ham o‘zining shinam fermerlik uyida yashaydi. U yerda aktrisa tovuq boqish, sabzavot va mevalar yetishtirish, shuningdek, ot minish kabilar bilan shug‘ullanadi. Darvoqe, Juliya Roberts ajoyib chavandoz hamdir.
“Turmush o‘rtog‘im oilamiz salomatligi va atrof-muhitga juda katta e’tibor beradi, shuning uchun biz oziq-ovqat mahsulotlarini o‘zimiz yetishtiramiz va har kuni yangi, organik jihatdan toza mahsulotlar iste’mol qilamiz”, — deydi aktirsa.
Amanda Sayfred
Amerikalik aktrisa va xonanda Amanda Sayfred turmush o‘rtog‘i Tomas Sadoski va farzandlari bilan Katskill shahrida yashaydi. Ularning keng fermasida 30 ga yaqin uy hayvonlari — jo‘ja, o‘rdak, tovuq, echki, otlar va boshqa ko‘plab hayvonlar bor.
Aktrisaning so‘zlariga ko‘ra, tongda barvaqt uyg‘onib, hayvonlarga yemish berish bir soat vaqtini oladi. Bu jarayon yulduzni ba’zan charchatsa ham, faqat ijobiy his-tuyg‘ularni beradi.
Zeyn Malik
Britaniyalik xonanda fermada nafaqat dam olish, balki bog‘dorchilik bilan shug‘ullanish bilan ham vaqt o‘tkazadi.
Bundan tashqari xonanda Pensilvaniyadagi fermada sigir, ot, tovuq va it va mushuklarni boqadi. Malikning so‘zlariga ko‘ra, tabiat qo‘ynida vaqt o‘tkazish uning qalbini tinchlantiradi.
Izoh (0)