Yevropa Ittifoqi va O‘zbekiston o‘rtasida so‘nggi yillarda savdo ko‘rsatkichlari jadal sur’atlar bilan o‘sdi. 2023-yilda Yevropa Ittifoqidan eksport 16 foizga oshib, 4,35 milliard yevroga yetdi. Bu haqda Yevropa Ittifoqining O‘zbekistondagi elchisi Sharlotta Adrian EUROUZ bilan hamkorlikda bo‘lib o‘tgan tadbirda ma’lum qildi.
“O‘zbekiston xorijiy investorlarga yosh, bilimli aholi va boy tabiiy resurslardan tortib jadal o‘sib borayotgan bozorgacha taqdim eta oladigan ulkan salohiyatga egaligini bilasiz. Yevropa Ittifoqi—O‘zbekiston hamkorligining 30 yilligini nishonlar ekanmiz, so‘nggi yillarda savdo ko‘rsatkichlarimiz jadal sur’atlar bilan o‘sib borayotganini ko‘rib, mamnunman. Qisqacha misol: 2022-yilda Yevropa Ittifoqi eksporti 3,77 milliard yevroga (o‘sish 63,9 foiz), 2022-yilda Yevropa Ittifoqi importi esa 845 million yevroga (o‘sish 77,1 foiz) yetdi. 2023-yilda umumiy savdo aylanmamiz yana 11 foizga o‘sdi”, — deydi elchi.
Ta’kidlanishicha, 2023-yilda Yevropa Ittifoqi eksporti 16 foizga o‘sib, 4,35 milliard yevroga yetgan, import esa 8 foizga qisqarib, 780 million yevroni tashkil qilgan.
O‘zbekiston boshlagan ulkan islohotlar yo‘lini qo‘llab-quvvatlaymiz. O‘zbekistonga o‘z ixtiyorimizda bo‘lgan barcha vositalardan foydalangan holda yordam ko‘rsatishda davom etamiz, ulardan biri GSP+, O‘zbekistonning JST yoki EPCA’ga a’zo bo‘lishini qo‘llab-quvvatlashdir. Hamkorligimizdan asosiy maqsad O‘zbekistonning umumiy iqtisodiy rivojlanishiga hissa qo‘shishdir. Islohotlar Yevropa kompaniyalari uchun teng shart-sharoitlar ham yaratadi, bu esa ko‘proq Yevropa kompaniyalarining O‘zbekistonga e’tibor qaratishiga sabab bo‘ladi, — deydi elchi.
Sharlotta Adrian Yevropa Ittifoqi O‘zbekistonning Yevrosiyo qit’asining o‘rtasida joylashgan geografiyasi va dengizga chiqish imkoniyati yo‘qligidan yaxshi xabardorligini aytdi. Elchi mamlakatlar, bozorlar va odamlar o‘rtasida yanada mustahkam, yashil va barqaror kommunikatsiyaga sarmoya kiritish uchun Global Gateway ishga tushirilganini ta’kidladi.
Transkaspiy transport koridori, shuningdek, Digital Team Europe tashabbusi diversifikatsiyani qo‘llab-quvvatlash, ko‘proq mintaqaviy hamkorlik uchun imkoniyatlar yaratishda birgalikdagi sa’y-harakatlarni ifodalaydi, — deydi Yevropa Ittifoqining O‘zbekistondagi elchisi.
Tadbir davomida EUROUZ bosh kotibi Oybek Shayxov va boshqaruv a’zosi Lui Skayner chet el investorlarini, mahalliy biznes vakillarini va O‘zbekiston hukumatini samarali dialog uchun platforma yaratish, ko‘proq imkoniyatlarni amaliy investitsiyalarga aylantirish va Yevropa mamlakatlari bilan umumiy hamkorlikni rivojlantirish zarurligini aytdi.
Shuningdek, Yevropa Ittifoqi va O‘zbekiston o‘rtasidagi iqtisodiy hamkorlikni rivojlantirishga sodiqliklarini tan olish uchun EUROUZning 17 ta yangi a’zosi a’zolik sertifikatlari bilan taqdirlandi.
Izoh (0)