O‘zbekistonda 4-iyun holatiga ko‘ra, qiymati 462,2 million dollarga teng 776 ming tonnadan ortiq meva-sabzavot mahsulotlari eksporti amalga oshirilgani ma’lum bo‘ldi.
Xabar berilishicha, joriy yil respublikada qishloq xo‘jaligi va oziq-ovqat sanoati mahsulotlarining eksport prognoz ko‘rsatkichlari hajmi 3,5 milliard dollar, shundan 2,5 milliard meva-sabzavot va 950 million oziq-ovqat mahsulotlari etib belgilangan.
O‘simliklar karantini va himoyasi agentligida “Markaziy Eksport shtabi” tashkil etilib, 21 nafar mutaxassis biriktirildi hamda 14 ta hududda “Eksport shtab”lari faoltiyati yo‘lga qo‘yildi. O‘zbekistonning xorijiy davlatlardagi elchixonalar bilan hamkorlikda ishlar tashkil etilgan bo‘lib, “Eksport shtabi” a’zolari 39 ta xorijiy davlatlar elchixonalariga biriktirildi.
Mazkur shtablarning asosiy vazifalari – samarali ish tashkil qilish, eksportchi korxonalarga maksimal darajada ma’lumotlar va muammoli masalalar yechimida amaliy ko‘mak berish, mavjud imkoniyatlardan to‘laqonli foydalanish, respublikamizning eksport salohiyatini namoyish etish va jahon bozoriga chiqarilgan mahsulotlar hajmini yanada oshirishdan iborat.
Undan tashqari, shtabda respublikadagi eksportbop qishloq xo‘jaligi mahsulotlarining kunlik narx-navosi monitoringi, omborxonadagi mavjud qishloq xo‘jaligi mahsulotlarining qoldig‘i va yaqin 20 kunda pishib yetiladigan mahsulotlar bo‘yicha ma’lumotlar, eksportchi korxonalarning eksport masalalari bilan bog‘liq muammoli masalalarini o‘rganish va ularni tezkor xal etish bo‘yicha zarur chora-tadbirlar amalga oshirib kelinmoqda.
Izoh (0)