O‘zbekistonda aholidan jamoat ehtiyojlari uchun olib qo‘yilgan yer uchastkalari uchun kompensatsiyalarni to‘liq to‘lash choralari ko‘riladi. Bu haqda 3-iyun kuni parlament quyi palatasi majlisida bosh vazir o‘rinbosari, iqtisodiyot va moliya vaziri Jamshid Qo‘chqorov maʼlum qildi.
Qonunchilik palatasi majlisida Jamshid Qo‘chqorov davlat byudjetining 2023-yil hamda 2024-yilning I choragidagi ijrosi bo‘yicha axborot berdi. Muloqotda deputat Doniyor G‘aniyev byudjet hisobidan fuqarolardan jamoat ehtiyojlari uchun olib qo‘yilgan yer uchastkalari uchun tovon pullari to‘liq to‘lab berilmayotgani masalasini ko‘tardi.
“Prezident qarorida davlat byudjetiga qo‘shimcha manbalardan tushadigan mablag‘lar, avvalo, jamoat ehtiyojlari uchun fuqarolardan olib qo‘yilgan yerlar uchun qarzdorliklar mavjud bo‘lsa, to‘lanishi, keyin boshqa maqsadlarga ishlatilishi belgilangan. Statistikaga ko‘ra, 2024-yil I choragida 712 milliard so‘m qarzdorliklardan 418 milliard so‘mi to‘lab berildi. Holbuki, jamg‘armaga 108 milliard so‘m ajratilgan ekan, qaror orqali qo‘shimcha yana 300 milliard so‘m to‘lab berilishiga sharoit yaratildi. Baʼzi hududlar, jumladan, Buxoro va Namangan viloyatlari hamda Qoraqalpog‘istonda qarzdorliklar to‘liq bartaraf etildi. Lekin ming afsuski, ayrim viloyatlarda to‘lov masalasi paysalga solinyapti. Davlat rahbarining qarorida belgilangan bo‘lsa–da, qo‘shimcha manbalardan tushadigan mablag‘larni qarzdorliklarga yo‘naltirilmasdan boshqa maqsadlarga sarflash holatlari kuzatilmoqda. Natijada fuqarolarning 300 milliard so‘mlik mulkiy zararlari to‘lab berilmayapti”, — dedi deputat.
Jamshid Qo‘chqorov mazkur masala yuzasidan gapirarkan, qarzdorliklarni to‘liq yopish choralari ko‘rilishiga vaʼda berdi.
“Jamoat ehtiyojlari uchun olib qo‘yilgan yer uchastkalari uchun kompensatsiya to‘lashga mablag‘lar yetarli. Siz aytgan raqamlarni ko‘rib chiqishimiz kerak. Jamoat ehtiyojlari uchun olib qo‘yilgan yer uchastkalari uchun yetkazilgan zarar o‘rnini qoplash bo‘yicha eng katta qarzdorligimiz Toshkent shahri, Surxondaryo va Samarqand viloyatlariga to‘g‘ri kelyapti. Undan keyin Andijon vilotyati turibdi. Bu qarzdorliklarning har birini yopish bo‘yicha choralar ko‘ramiz, buni ishontirib aytaman. Ushbu sohadagi vaziyatni keskin yaxshilash choralarini ko‘ramiz”, — dedi vazir.
Avvalroq Buxoro shahrida “Boqiy Buxoro” parki qurilishi uchun aholi va ishbilarmonlarga tegishli binolar “snos” obyekti sifatida baholanishi jamaotchilik muhokamalariga sabab bo‘lgandi.
Izoh (0)