Rossiyada yanvardan maygacha bo‘lgan davrda ishlash yoki yashash uchun ruxsatnoma olish maqsadida rus tili, tarix va Rossiyaning asosiy qonunchiligi bo‘yicha imtihonlardan o‘ta olmagan xorijliklar ulushi qariyb 10 barobar oshdi. Bu haqda mamlakat Ta’lim va fan vazirligiga tayanib, “TASS” xabar berdi.
Vazirlikning ta’kidlashicha, imtihon topshirish jarayoniga bo‘lgan yuqori e’tibor shunday natijaga sabab bo‘lmoqda.
“Rossiya bo‘ylab imtihon topshirish imkoniyati saqlanib qolmoqda. Shu bilan birga, imtihon tartibiga rioya qilish darajasi ham oshdi — yanvardan maygacha imtihondan o‘tmaganlar foizi deyarli 10 baravarga ko‘paydi”, — deyiladi xabarda.
Hozirda Rossiyada migrantlar imtihon topshirishi uchun 129 ta maydon mavjud. Ulardan 41 tasi Rossiya Ichki ishlar vazirligi negizida, 87 tasi federal va mintaqaviy universitetlar negizida, yana 1 tasi mintaqaviy davlat tashkiloti negizida faoliyat yuritadi.
Taʼlim va fan vazirligi 1-maydan boshlab tijorat tashkilotlariga xorijliklar uchun imtihon o‘tkazish va ularga sertifikatlar berish taqiqlanganini eslatmoqda.
Izoh (0)