Islom Maxachev: “Habib men sabab Chempionlar Ligasi finalini o‘tkazib yuboradi”

Islom Maxachev Habib Nurmagomedov uning jangi tufayli Chempionlar Ligasi finalini o‘tkazib yuborishini aytdi.

Yengil vazn toifasida amaldagi UFC chempioni Islom Maxachev Match TV telekanalida Habib Nurmagomedov bilan suhbatda amerikalik Dastin Porye bilan bo‘lgan jangining Chempionlar Ligasi finalidan muhimroq voqea ekanini ta’kidlagan.

— Chempionlar Ligasi finalini tomosha qilasizmi?

— Ehtimol. Hamma yigitlar futbolni yaxshi ko‘radi. Ayniqsa, katta o‘yinlarni. Habib mening jangim tufayli Chempionlar Ligasi finaliga bora olmasligini aytdi. Men Chempionlar Ligasi finali har yili bo‘ladi, Maxachev—Porye jangi esa faqat bir marta bo‘ladi, deb javob berdim.

— Kimning g‘alaba qozonish imkoniyati ko‘proq: Porye yoki “Borussiya”?

— Bilmayman. Menimcha, “Borussiya”da 50/50 imkoniyat bor”, — dedi yengil vaznda UFC chempioni Islom Maxachev.

Ma’lumot uchun, Maxachev va Dastin Porye o‘rtasidagi chempionlik jangi UFC 302 doirasidan o‘rin olgan va 1-iyundan 2-iyunga o‘tar kechasi bo‘lib o‘tadi.