Shvetsiya hukumati 29-may kuni Ukrainaga 1,3 milliard dollar miqdorida harbiy yordam mablag‘i ajratishini eʼlon qilgan. Bu haqda Shvetsiya Mudofaa vazirligi tarqatgan xabarga asoslanib, The Kyiv Independent nashri maʼlum qildi.
Shvetsiya Mudofaa vazirligi chorshanba kuni Ukrainaga 13,3 milliard shved kronasi qiymatidagi yangi harbiy yordam paketini ajratishini rasman eʼlon qilgan. Bu so‘nggi yordam dasturi Shvetsiyaning Ukraina urushi boshlanganidan beri eng katta harbiy yordam paketidir.
Mudofaa vazirligining qo‘shimcha qilishicha, yordam paketi ASC 890 radar razvedka va nazorat samolyotlari, “Pansarbandvagn-302” piyodalar jangovar mashinalari, artilleriya snaryadlari, havoga qarshi raketalar va ilgari sovg‘a qilingan harbiy texnikani saqlash va to‘ldirishga yordam beradigan materiallarni o‘z ichiga oladi.
Paket shuningdek, moliyaviy yordam, sunʼiy yo‘ldosh aloqasi resurslari va Shvetsiyaning Total Defense Research Institute muassasasi tomonidan Ukrainaga o‘z tadqiqot imkoniyatlarini rivojlantirishga yordam berish uchun mandatni ham o‘z ichiga oladi.
Ukraina prezidenti Vladimir Zelenskiy Shvetsiyaga harbiy yordam paketi uchun minnatdorchilik bildirib, “bu taʼminotlar Ukraina mudofaasi va mustahkamligi uchun juda muhim” ekanligini aytgan.
28-may kuni ham Shvetsiya hukumati Ukrainaga 615 million shved kronasi (58,2 million dollar) qiymatidagi yangi energiya yordam paketi taqdim etishini eʼlon qilgan edi. Oradan bir kun o‘tib, yangi harbiy yordam paketi tasdiqlan.
Maʼlumotlarga ko‘ra, Shvetsiya hozirga qadar Ukrainaga 9 milliard dollarga yaqin qiymatdagi harbiy va moliyaviy paketlar taqdim etgan. Hukumat 2024-2026-yillarda ham jami 7 milliard dollar mablag‘ Kiyev uchun ajratilishini rasman tasdiqlagan.
Izoh (0)