Kichik tammadixonalarda qo‘shiq aytib, ijtimoiy tarmoq foydalanuvchilari orasida tanilgan xonanda Doston Ergashev 24—25-may kunlari “Xalqlar do‘stligi” san’at saroyida yakkaxon konsert dasturini muxlislar e’tiboriga havola etdi.
Xonanda har yili bitiruvchilar kuni arafasida konsert berish san’atkorlar orasida “talash” bo‘lishi va buning o‘ziga yarasha mas’uliyati borligi haqida gapirdi.
— Konsertimizga muhabbatga yaqin qalblar, ya’ni bitiruvchilar ham kelishini inobatga olgan holda sho‘xroq kuy-qo‘shiqlarni ko‘paytirdik. Muxlislar mendan sokin taronalar eshitishga o‘rganib qolgan, lekin bu yangiligimiz ularga manzur keladi deb o‘ylayman. Konsertning qaysi sanada berilishi muhim emas, chunki har bir sananing o‘ziga yarasha mas’uliyati bor.
Xonanda konsertidagi kamchiliklar va muxlislar to‘poloni haqida aytib o‘tdi.
— Ozroq hayajon bo‘lishi tabiiy, musiqiy tomondan 1-2 soniyalik kechikishlar bo‘ldi. Konsert dasturimiz oxirida muxlislarimga sovg‘a berish jarayonidagi biroz tartibsizlikni hisobga olmasa, menimcha qolgani ko‘ngildagidek o‘tdi. Muxlislar sahnaga chiqib oldi, sovg‘alarim hammaga yetmasa ham o‘z egalarini topyapti. Qolgan hammasi zo‘r, — deydi xonanda Doston Ergashev.
Qizg‘in o‘tgan konsertga Sanjar Shodiyev boshlovchilik qildi. Dastur davomida Doston Ergashevning boshqa muxlis va muxlisalari qatori tojikistonlik tinglovchisi ham sahnaga chiqib, xonandaning qo‘shig‘ini havaskor tarzda ijro qilib berdi.
Boshqa muxlisasi esa Doston Ergashevning shaxsan o‘zi bilan jonli kuyladi. Battl so‘ngida xonanda ikki nafar g‘olibga gitara sovg‘a qilib, bu u uchun juda ham qadrli ekanini aytib o‘tdi.
Xonanda konsert yakunida muxlislari bilan esdalik video va fotolarga tushdi, dastur ajoyib tarzda yakunlandi.
Izoh (0)