“100 ta uchrashuv esdan chiqishi mumkin, ammo Superkubok yodda qoladi”. “Paxtakor” va “Nasaf” bosh murabbiylari ishtirokida matbuot anjumani o‘tkazildi

Futbol bo‘yicha O‘zbekiston Superkubogi uchrashuvi 29-may, chorshanba kuni bo‘lib o‘tadi.

Unda “Paxtakor” va “Nasaf” jamoalari o‘zaro to‘qnash keladi. Uchrashuv oldidan jamoalar murabbiylari ishtirokida matbuot anjumani o‘tkazildi.

Ertaga hujum qilishni yoqtiradigan ikki klub bahslashadi. Qolaversa, stadion ham ajoyib holatda. Ertaga stadionga ancha muxlis kelsa kerak. Biz esa, o‘z navbatida ularga yoqadigan futbol namoyish etishga intilamiz.

Superkubok — mavsum davomida o‘ynaladigan uchta sovrindan biri. Chempionat, Kubok va Superkubok. Bu sovrinlarning ahamiyati bor. Shunchaki, oddiy bir bahsdek qaramayapmiz. Yutishni istaymiz. “Bunyodkor” stadionida hali faoliyatida futbol o‘ynamagan o‘yinchilarimiz bor. Ular uchun ham juda muhim bahs va bu ular uchun birinchi sovrin bo‘lishi mumkin. Borimizni beramiz va sovrinni yutishga harakat qilamiz. Umid qilamanki, ertaga stadionda muxlislarimiz bizni yolg‘izlatib qo‘yishmaydi.

Tarix bilan yashamaymiz. Ertaga yangi kun va yangi o‘yin. Raqib bilan oldingi o‘yinlardagi statistika xatto esimda ham yo‘q. Bu borada umuman o‘ylamayapmiz. Ertaga faqat g‘alaba uchun o‘ynaymiz.

Agar “Nasaf”da muammolar bor deyilsa, unda men o‘z muammolarimiz haqida gapirmay qo‘yaqolay. Biz mavsum boshidan buyon muammolar bilan kurashayapmiz. Agar, biz o‘yinlar davomida yaratayotgan vaziyatlarimizni ko‘rsangiz buni tushunishingiz mumkin. Agar biz ushbu vaziyatlarning yarmidan foydalana olganimizda peshqadam bo‘lardik. Mana, yonimda o‘tirgan Doston Hamdamov to‘purar bo‘lardi. Chunki u yaratilayotgan vaziyatlar bo‘yicha chempion.

Darvozada kim turishini ertaga bilib olasiz.  Yaxshi tayyorlandik, futbolchilar qanday raqib bilan o‘ynayotganini biladi. Yoshlarga ko‘p umid bildiryapmiz. Albatta, yoshlar baraqaror o‘ynashmaydi. Bu barcha yoshlarda muammo. Ular ham o‘yin darajasini his qilishyapti.

Umid qilamanki stadionga ancha muxlislar keladi. Vaqt ajratib, oilasi bilan kelib jamoalarni qo‘llab-quvvatlab turishadi. Biz esa, ularga yoqadigan, ularni xursand qiladigan o‘yin namoyish etishga harakat qilamiz.

Maksim Shatskix, “Paxtakor” bosh murabbiyi

Tayyorgarlikni Qarshidagi qarorgohimizda olib bordik. Toshkentga bugun etib keldik. Raqib safidagi futbolchilar haqida yetarlicha tushuntirish berdik. Chiroyli o‘yin ko‘rsatib, muxlislarni xursand qilishga harakat qilamiz.

Kubok bahslaridan chiqib ketganimiz biz uchun ancha og‘riqli bo‘ldi. Muxlislarimiz oldida ham ancha uyatga qoldik. “Navbahor”ga mag‘lub bo‘lganimizdan keyin ancha tushkun vaziyatga tushib qoldik. Ikkita safar o‘yinida ijobiy natija ko‘rsata olmadik. Buning o‘ziga yarasha sabablari bor albatta. Buni futbolchilar ham biladi. Qanchalik og‘riqli bo‘lmasin, buni qabul qilishimiz kerak. Oldimizda boshqa katta maqsadlar bor. Shu maqsadlarga erishish uchun harakat qilamiz.

Albatta, o‘yin oldidan ancha muammolarga duch keldik. Uch nafar markaziy himoyachimiz yo‘q. Ularning o‘rnilarini boshqa pozitsiyadagilar bilan to‘ldirishga majburmiz. Umid qilamanki, ular ertaga ishonchni oqlay oladilar.

Bu o‘yinga futbolchilarni ruhlantirish shart emas. Bitta o‘yindan iborat final deyish mumkin. Oldingi o‘yinlardagi natijalarimizni esdan chiqarish mumkin. Ammo, bunday o‘yinlar doim esda qoladi. Buni futbolchilar ham juda yaxshi bilishadi. Ammo, shunday bo‘lsada buni futbolchilarga tushuntirishga harakat qilayapmiz.

Hozir futbolda shunday tendentsiya paydo bo‘ldi. Zamonaviy futbolda natija muhim bo‘lib borayapti. Shuning uchun ba’zida hujumkorlikdan himoyaviy futbolni afzal ko‘ramiz. Hatto, “Real” ham kerak bo‘lsa himoyada o‘ynayapti. Bu futbol.

Qaysidir murabbiyga qarshi alohida tayyorgarlik ko‘rmayman. Shatskix bilan o‘zaro statistikam yaxshi bo‘lishi mumkin. Ammo, buni hozir o‘ylamayapman. Dragan Cheranni yaxshi bilaman. Buni kecha mashg‘ulotlar paytida futbolchilar bilan gaplashgandik. Raqib jiddiy. Bizga qarshi boshqacha motivatsiya bilan o‘ynaydi. Boshqa o‘yinlarda ular yaxshi natija ko‘rsata olmayotgan bo‘lishlari mumkin. Ammo, “Nasaf”ga qarshi boshqacha “Paxtakor”ni ko‘rish mumkin. Bitta o‘yinga “Paxtakor” bemalol futbolchilarni ruhlantira oladi.

Futbolimiz darajasi o‘sib bormoqda. O‘yin sifati ham ancha oshdi. Stadionlarga muxlislar tashrifi ancha oshgan. Bu quvonarli holat, albatta. Jamoalarning saviyasi o‘sgani yaqqon bilinayapti. Qiziqarli o‘yinlar soni ko‘paydi. O‘ylaymanki, ertaga ham stadionga ko‘plab muxlislar keladi.

Ro‘ziqul Berdiyev, “Nasaf” bosh murabbiyi

Eslatib o‘tamiz, Superkubok uchrashuv 29-may kuni 19:00 da start oladi.