Gongkongda 28-may kuni Xitoy hukumatiga qarshi targ‘ibot yuritishda ayblangan 6 nafar fuqaro hibsga olindi. Bu haqda BBC nashri xabar berdi.
Manbada aytilishicha, hibsga olingan fuqarolar ijtimoiy tarmoqlarda Pekinga qarshi “nafrat kayfiyati uyg‘otuvchi” materiallarni eʼlon qilib borgan. Xitoy hukumatining yaqin o‘tmishdagi agressiv qarorlari haqida postlar joylagan.
Besh nafar ayol va bir erkak seshanba kuni hibsga olingani maʼlum qilingan. Hibsga olinganlar orasida taniqli inson huquqlari faoli Chou Hang Tung ismli shaxs ham bor. U guruhga rahbarlik qilgani aytilgan.
Rasmiylarning taʼkidlashicha, guruh 1989-yilning 4-iyunida Pekindagi Tyananmin maydonida yuz bergan qonli voqealar haqida maʼlumotlarni ijtimoiy tarmoqlarda qayta tarqatishga uringan. Gongkongda ushbu voqealarda halok bo‘lgan talabalarni xotirlash uchun tadbir o‘tkazishga uringan.
Guruh sodir etgan harakati uchun 7 yilgacha ozodlikdan mahrum qilinishi mumkin. Ularga ayni damda davlatga xiyonat ayblovi ham qo‘yilmoqda.
Maʼlumot o‘rnida, Xitoy poytaxtidagi Tyananmin maydonida 1989-yilning 4-iyunida talabalar ishtirokida namoyish bo‘lib o‘tgan edi. Namoyishchilar Xitoy hukumatini siyosiy islohotlar qilishga chaqirgan.
Namoyishga javoban Xitoy hukumati Tyananmin maydoniga tanklar va harbiy qismlar kiritgan. Oqibatda minglab namoyishchilar halok bo‘lgan. Ushbu voqealar ortidan ko‘plab G‘arb davlatlari Xitoyga qarshi sanksiyalar kiritgan.
Tyananmin qurbonlarini xotirlash marosimlari Xitoyda 2020-yilda taqiqlangan. Bu to‘g‘risidagi har qanday voqeani esga olish va uni tarqatish, jamoatchilik orasida vahima qo‘zg‘ashga urinish jiddiy javobgarlikka tortilishi belgilangan.
Izoh (0)