26-may kuni Armaniston poytaxti Yerevanda minglab namoyishchilar mamlakat bosh vaziri Nikol Pashinyan iste’fosini talab qilib, namoyishda ishtirok etdi. Bu haqda Deutsche Welle xabar berdi.
Shuningdek, ular yaqinda to‘rt qishloqni Boku nazoratiga o‘tkazilishiga sababchi bo‘lgan Armaniston va Ozarbayjon o‘rtasidagi chegaraning delimitatsiya va demarkatsiya qilinishiga qarshi chiqqan.
Tavush yeparxiyasi rahbari arxiyepiskop Bagrat Galstanyan norozilik aksiyasi rahbari sifatida ishtirok etgan. U Arman Apostol cherkovi rahbaridan siyosiy kurashda ishtirok etish niyati tufayli uni lavozimdan chetlashtirishni so‘ragan.
“Vatan uchun Tavush” muxolifat harakati uni mamlakat bosh vaziriligiga nomzod qilib ko‘rsatgan. 26-may kuni bo‘lib o‘tgan mitingda so‘zga chiqqan Galstanyan Pashinyandan “madaniyatli yo‘l bilan” iste’foga chiqishni talab qilgan va bu bosh vazirning buning uchun so‘nggi imkoniyati ekanligini ta’kidlagan.
Xabar qilinishicha, namoyishchilar shaharning markaziy maydonidan Armaniston bosh vaziri qarorgohigacha piyoda borgan. Pashinyan miting kuni Yerevanda emas, mamlakat shimolidagi suv toshqini zonasida bo‘lgan.
Xuddi shu kuni Armaniston ichki ishlar vazirligi mamlakat shimolidagi suv toshqinlari yo‘llar va ko‘priklarni vayron qilgani haqida xabar bergan edi. 230 dan ortiq odam evakuatsiya qilingan, kamida bir kishi halok bo‘lgan. Vayronaga Debed daryosining toshib ketishi sabab bo‘lgan.
Hodisa oqibatida Tbilisi va Yerevan o‘rtasidagi poyezdlar qatnovi to‘xtatilib, yirik magistral yopilgan.
Izoh (0)