Xalqaro jinoiy sud (XJS) prokurori Karim Xon Isroil rasmiylari va HAMASning yuqori martabali amaldorlarini hibsga olishga order berish taklifini tushuntirdi. Bu haqda The Times xabar berdi.
Prokuror Isroil demokratik davlat va o‘zini himoya qilish huquqiga ega ekani, ammo hech kim insoniyatga qarshi jinoyat sodir eta olmasligini ta’kidladi. Misol tariqasida Karim Xon XX asrning ikkinchi yarmida Shimoliy Irlandiyadagi mojaroni keltirdi. U irlandlar sobiq bosh vazir Margaret Tetcherni o‘ldirishga uringani, shuningdek, bir qancha deputatlarga suiqasd uyushtirishganini esladi.
“Ammo inglizlar Fols-roudga 2000 funtlik bomba tashlaylik, demadi. Siz bunday qilolmaysiz”, — deya tushuntirdi prokuror.
U “prokurorlarning ishi do‘st orttirish emas”ligini ta’kidladi va Britaniya bosh vaziri Rishi Sunakning Isroil rasmiylarini hibsga olish uchun order berish foydasiz bo‘lishi haqidagi so‘zlariga shunday izoh berdi.
“Biz olqishlar yoki qoralashlardan qatʼi nazar, o‘z ishimizni qilishimiz kerak. Tobora qutblanib borayotgan dunyoda har bir bolaning, har bir ayolning, har bir fuqaroning teng qadrliligini ta’kidlashimiz kerak va agar buni qilmasak, bizdan nima naf”, — dedi Xon.
Karim Xon 20-may kuni Xalqaro jinoiy sudning dastlabki tergov palatasidan Isroil bosh vaziri Binyamin Netanyaxu, mudofaa vaziri Yoav Galant va HAMASning uch nafar yetakchisini insoniyatga qarshi jinoyatlarda ayblab hibsga olish uchun order berishni so‘radi. AQSH prezidenti Jo Bayden bu qarorni “g‘ayritabiiy” deb atadi. Buyuk Britaniya ham bunga qarshi chiqdi. Fransiya va Belgiya esa prokuror qarorini qo‘llab-quvvatladi.
Izoh (0)