Turkiyaning Izmir shahri qirg‘oqlariga yaqin hududda 26-may kuni qutqaruvchilar 37 nafar muhojirni qutqarib qolgan. Bu haqda Anadolu nashri xabar berdi.
Rasmiylar holat Karaburun tumaniga tegishli suv hududida yuz berganini xabar qilgan. Bortida muhojirlar bo‘lgan rezina qayiq dvigateli ishdan chiqishi oqibatida dengizda qolib ketgan. Qayiqdan yaqin atrofga uzatilgan halokat signaliga javoban Turkiya qutqaruv guruhlari hodisa joyiga jo‘nab ketgan.
Qayiqdan 30 nafar noqonuniy muhojirlar, jumladan, to‘rt nafar bola qutqarib olingan. Jarohatlangan yoki halok bo‘lganlar yo‘qligi aytilgan.
Chesme tumani qirg‘oqlarida ham qayiq aniqlangan. Uning ichida bo‘lgan, qiyin vaziyatga tushib qolgan 7 nafar fuqaro Turkiya qutqaruvchilari tomonidan xavfsiz hududga olib chiqilgan.
Urla tumani qirg‘oqlarida ham rezina qayiq aniqlangan. Qutqaruvchilar muhojirlar bilan bog‘liq shubhali harakatlarni sezgach, politsiyaga xabar bergan.
Sohil xavfsizlik guruhlari qayiqda bo‘lgan 29 shaxsni qo‘shimcha tekshiruv uchun hibsga olgan. Ular orasida 8 nafar voyaga yetmagan shaxs ham borligi aytilgan.
Urlada hibsga olinganlar tekshiruvdan o‘tkazilgach ozod qilingan. Ular hozircha viloyat migratsiya boshqarmasi ixtiyoriga topshirilgan.
Rasmiylar muhojirlarning shaxsi va ular kelgan hududlar haqida xabar bermagan. Ayrim manbalar halokatga uchragan qayiqlar Gretsiya dengiz kuchlari tomonidan Turkiya suvlariga haydab yuborilganini aytgan.
Izoh (0)