Papua-Yangi Gvineyada 25-may kuni yuz bergan ko‘chki oqibatida 2000 nafardan ko‘proq kishi qum ostida qolib ketgan. Bu haqda mamlakat hukumati va Milliy ofatlar markazi tarqatgan xabarga asoslanib, Reuters nashri xabar berdi.
Hukumat 27-may kuni 2 ming nafardan ko‘proq fuqaro qum ostida qolganini tasdiqlagan. Halokat sodir bo‘lgani haqidagi ilk maʼlumotlarda esa 300 dan ortiq shaxs ko‘chki ostida qolgani aytilgan edi.
Milliy ofatlar markazi oldinroq BMTga yuborgan maktubida keltirilgan raqamlar esa hukumat bayonotidan ancha farq qiladi. Markaz tuproq ostida qolib halok bo‘lganlar sonini 670 nafar atrofida deb hisobot taqdim etgan.
Baxtsiz hodisa juma kuni tongida Enga viloyatidagi Maip-Mulitaka hududida sodir bo‘lgan edi. Halokat oqibatida 4000 kishi istiqomat qilgan qishloqning katta qismi ko‘milib qolgan.
Ko‘chki sodir bo‘lganidan beri oradan o‘tgan 72 soatdan ko‘proq vaqt davomida faqat 5 ta jasad topilgan. Qidiruv ishlari asosan belkurak, tayoq va shu kabi vositalar bilan amalga oshirilmoqda.
Halokat nuqtasi viloyat markazidan 60 kilometr uzoqlikda joylashgani, relyef qiyinligi va asosiy magistralning to‘silib qolgani qutqaruv guruhlari uchun katta qiyinchilik tug‘dirayotgani aytilgan.
Hukumat qutqaruv ishlarini jadallashtirish uchun qo‘shimcha kuchlar safarbar qilinishini xabar bergan.
Izoh (0)