Nigeriyaning Niger shtati markazidagi qishloqqa jangarilar tomonidan uyushtirilgan hujumda kamida 10 kishi halok bo‘ldi, yana 160 kishi o‘g‘irlab ketildi. Bu haqda mahalliy aholiga tayanib, BBC xabar berdi.
“Boko Haram” islomiy guruhidan ekani taxmin qilingan qurolli jangarilar 24-may kuni kechqurun Kuchi qishlog‘iga kirib kelgan, — deydi mahalliy kengash raisi Aminu Abdulhamid Najume.
Uning so‘zlariga ko‘ra, o‘g‘irlanganlar orasida asosan ayollar va bolalar, halok bo‘lganlar orasida hudud xavfsizligini ta’minlagan mahalliy aholi bo‘lgan.
Ma’lumotlarga ko‘ra, jangarilar qishloqqa mototsikllarda kirgan va uylarni talon-taroj qilib, mahalliy aholini olib ketgan.
Xalqaro Amnistiya inson huquqlari tashkiloti ommaviy o‘g‘irlashdan chuqur xavotirda ekanini aytgan.
Jangarilarning qishloqqa bostirib kirishi Nigeriya hukumati odamlarning hayotini himoya qila olmaganining yana bir dalilidir. 2021-yildan beri jangarilar Kuchi qishlog‘iga doimiy hujum qilib, ayollar va qizlarni zo‘rlamoqda, — deyiladi xabarda.
Tashkilotga ko‘ra, jangarilar ko‘pincha aholidan katta miqdorda to‘lov talab qiladi.
Izoh (0)