Toshkentda o‘zini treyderlik faoliyati bilan shug‘ullanishini aytib, o‘zganing 23 mln so‘mini o‘zlashtirgan shaxs ushlandi

Toshkent shahrida yashovchi 52 yoshli (ayol) Yu.A. ichki ishlar organlariga murojaat qilib, bank kartasidan 23 mln so‘m miqdoridagi pul mablag‘lari nomaʼlum shaxs tomonidan firibgarlik yo‘li bilan o‘zlashtirilganligini maʼlum qilgan. Bu haqda Kiberxavfsizlik markazi xabar berdi.

Maʼlum qilinishicha, o‘tkazilgan tezkor-qidiruv tadbirlari natijasida mazkur jinoyatni Toshkent shahrida yashovchi (ayol) Yu.Z. sodir etganligi aniqlangan.

Unga ko‘ra, Yu.Z. jabrlanuvchi Yu.A. bilan Telegram’dagi kanali orqali tanishib, unga o‘zini treyderlik faoliyati bilan shug‘ullanishini va pullarini oz fursatlarda ko‘paytirib berishini vaʼda qilgan. Natijada aldov yo‘li bilan 23 mln so‘m miqdoridagi mablag‘ni o‘tkazib olishga erishib, pullarni o‘z ehtiyojlariga sarflab yuborgan.

Mazkur holat yuzasidan Yu.Z.ga nisbatan JKning 168-moddasi (firibgarlik) 3-qismi “g” bandi bilan jinoyat ishi qo‘zg‘atilgan.