HAMAS rasmiysi Usama Hamdan Isroil bilan yangi muzokaralarga ehtiyoj yo‘qligini aytdi. Bu haqda Al Jazeera xabar berdi.
Hamdan zudlik bilan Isroil G‘azo sektorini tark etishi va barcha tajovuzlarni to‘xtatishi kerakligini ta’kidladi. “Bizga yangi muzokaralar kerak emas”, — dedi u va HAMAS avvalroq otashkesim taklifiga rozi bo‘lgani, biroq Isroil buni rad etganini eslatdi.
May oyi boshida HAMAS Qatar va Misr vositachilari tomonidan ilgari surilgan yetti oylik G‘azoda o‘t ochishni to‘xtatish bo‘yicha taklifni ma’qullagan bo‘lsa-da, Isroil bu taklifni rad etgandi.
Isroilning muzokaralarga kirishish bo‘yicha yangi takliflarni qabul qilishiga hech qanday kafolat yo‘q... Jiddiy kafolatlarsiz bu Isroilga agressiyasini davom ettirish uchun ko‘proq vaqt berishni anglatadi, — deydi Usama Hamdan.
25-may kuni Isroil matbuoti yaqin kunlarda Isroil G’azoda garovga olinganlarni ozod qilish bo‘yicha muzokaralarni yangilash niyatida ekanini bildirdi. Isroil razvedka xizmati rahbari David Barnea vositachilar — AQSH Markaziy razvedka boshqarmasi direktori Bill Berns va Qatar bosh vaziri Muhammad bin Abdulrahmon al Tani bilan to‘xtab qolgan muzokaralar uchun yangi asosga kelishib olgani ta’kidlandi.
Yangi taklif Isroil muzokara guruhi tomonidan ishlab chiqilgan. Ammo mudofaa vazirligi rasmiylarining fikricha, Isroil vaqtinchalik o‘t ochishni to‘xtatishga rozi bo‘lgan taqdirda ham bir necha oydan so‘ng kerak bo‘lganda yana urushga qaytishi mumkin.
HAMAS vaqtinchalik sulhni qabul qilishga tayyor emasligi, balki janglar butunlay yakunlanishi kerakligini ta’kidlab keladi.
Izoh (0)