Turkiya xavfsizlik kuchlari 25-may kuni Egey dengizida 72 nafar noqonuniy muhojirni qutqarib qolgan. Bu haqda Anadolu nashri xabar berdi.
Holat Turkiyaning Mug‘la viloyatiga qarashli Bodrum shahri qirg‘oqlarida yuz bergan. Turkiya qirg‘oq qo‘riqlash xizmati qirg‘oqdan uncha uzoq bo‘lmagan hududda muhojirlar qayig‘i aniqlanganini tasdiqlagan.
Manbaga ko‘ra, noqonuniy muhojirlarni olib ketayotgan qayiqning dvigateli ishlamay qolgan. Cho‘kish arafasida turgan qayiqdagi muhojirlarni qutqarish uchun Turkiya qirg‘oq qo‘riqlash qo‘mondonligi tomonidan maxsus qayiqlar yuborilgan.
Qutqaruvchilar qayiqda 22 nafar voyaga yetmagan bola borligini maʼlum qilgan. Qutqarib olingan muhojirlarga tezkor ravishda yordam ko‘rsatilgan.
Qayiq ichida bo‘lgan bir nafar fuqaro odam savdosi ayblovi bilan qo‘lga olingan. Qolgan muhojirlar esa viloyat migratsiya boshqarmasiga yuborilgan.
Izoh (0)