“ ‘Ko‘k jiguli’ qo‘shig‘iga aloqam yo‘q” — Hamdam Sobirov “Mango”ning tiklanmasligi va unga taqlid qilayotganlarga munosabat bildirdi (foto, video)

Yoshlar orasida qo‘shiqlari ommalashib borayotgan xonanda Hamdam Sobirov navbatdagi konsert dasturini “Humo arena”da o‘tkazdi. “Daryo” muxbirlari sahna va uning ortidagi qiziqarli jarayonlar haqida reportaj tayyorladi. Bundan tashqari, xonanda muxlislarni qiziqtirgan baʼzi savollarga ham javob berib o‘tdi.

— “Mango” guruhi qayta tiklanishi mumkinmi?

— Bu guruh yoshligimiz, sahnaga endi chiqqan paytlarimizni eslatadi. Guruh tarkibida bo‘lgan do‘stlarimni yaxshi ko‘raman. Ularga oilaviy baxt va omad tilayman. Ammo hammamizning yoshimiz ulg‘ayib qoldi, oilali va farzandlik bo‘ldik. Shuning uchun guruh endi qayta tiklanmaydi, deb o‘ylayman.

— Guruhdan ajralganingiz sizga omad olib keldi, deb hisoblaysizmi?

— Hech qachon bunday deb hisoblamaganman. Chunki “Mongo” guruhi ham elimiz nazarida bo‘lgan, uning ham o‘ziga yarasha muxlislari, o‘ziga yarasha yutuqlari bo‘lgan.

— Hamdam Sobirovning uslubi shou-biznes vakillari orasida ommalashdi. Yo‘nalishingiz qachondir o‘zgarishi mumkinmi?

— Albatta mumkin. Lekin aniq aytolaman, zamonaviy bo‘lmaydi. O‘sha eskicha deyilayotgan qo‘shiqlar, raqslar xalqimiz qalbiga ancha yaqin. Buni ham qaysidir maʼnoda milliylik desak bo‘ladi. Zamonaviy musiqalarni 10 foiz odam eshitishi mumkin, ammo milliy qo‘shiqning muxlislari ancha ko‘p. Shu bois qachondir stilimni o‘zgartirsam ham u zamonaviy bo‘lmaydi.

— Nega konsert berish uchun “Humo arena”ni tanladingiz?

— (kulib) Muxlislarim ozmi-ko‘pligini bilish uchun. Albatta, bu hazil. Bilmadim, negadir “Humo arena”da konsert bergimiz keldi. Bir necha kun konsert berishga vaqtimiz yo‘qligi uchun hamma muxlislarni bitta konsertga taklif etishni xohladik.

— “Ko‘k jiguli” qo‘shig‘ini Ozoda Nursaidovaga sovg‘a qilganingiz rostmi?

— Yo‘q, bu qo‘shiqning muallifi Ozoda Nursaidovaning o‘zi. Unga hech qanday aloqam yo‘q. Ammo ko‘pchilik bu qo‘shiqni men yozib berganman deb o‘ylagan ekan. Balki yo‘nalishi o‘xshashdir.

— Keyingi paytlarda shou-biznesda Hamdam Sobirovga o‘xshashlar ko‘payib bormoqda. Bunga munosabatingiz qanday?

— Ajoyib, mayli karvon ko‘p rizqi bo‘lak. Xalqimiz ko‘nglidan joy olishlarini istayman. Birorta sanʼatkorga nisbatan ko‘nglimda adovat yo‘q. Xalqning ishonchini oqlasam bo‘ldi, sanʼatkorlar bilan raqobatlashishni istamayman.

Agar xonandaning konsert dasturiga tashrif buyurolmagan bo‘lsangiz, albatta YouTube’dagi maxsus reportajimizni tomosha qiling.