Armaniston bosh vaziri Nikol Pashinyan o‘tirgan vertolyot 25-may kuni shimoliy hududga jo‘nab ketish davomida favqulodda qo‘nishni amalga oshirgan. Bu haqda Anadolu nashri arman manbalariga asoslanib, xabar bergan.
Dastlabki maʼlumotlarga ko‘ra, Pashinyan Armaniston poytaxti Yerevandan 152 kilometr shimolda joylashgan Gruziya bilan chegaradosh Tashir shahriga uchayotgan bo‘lgan. Yomon ob-havo sharoiti tufayli vertolyot tezkor qo‘ndirilgan.
Rasmiylar hodisa Armaniston shimolidagi tog‘li Lori viloyatida yuz berganini bildirilgan. Nikol Pashinyanning vertolyoti Lori viloyatining markazi, mamlakatdagi uchinchi eng yirik shahar bo‘lgan Vanadzor yaqinida qo‘ndirilgan.
Yomon ob-havo tufayli vertolyotimiz Vanadzorga favqulodda qo‘ndi. Endi mashinada sayohatni davom ettiramiz. Barchangizga xayrli kun tilayman, — deya xabar qoldirgan Armaniston bosh vaziri Nikol Pashinyan Facebook tarmog‘idagi sahifasida.
Armanistondagi bir qancha manbalar bosh vazir Tashir shahridan so‘ng mamlakat shimoli-sharqidagi Baganis tumaniga borishi kerakligini yozgan. Baganis qo‘shni Ozarbayjon bilan chegaradosh tuman hisoblanadi. Ushbu tuman hududining Ozarbayjon bilan chegaradosh qismi to‘liq demarkatsiya qilingan.
Izoh (0)