Xorazm viloyati Urganch shahrida “layk” yig‘ish maqsadida mashina oynasini sindirib, bir-birini haqorat qilgan shaxslarga ma’muriy qamoq jazosi tayinlandi. Bu haqda viloyat IIB axborot xizmati xabar berdi.
Ijtimoiy tarmoqlarda ikki nafar yigit bir-biri bilan janjallashgani tasvirlangan video tarqaldi. Lavhada ulardan biri onasini so‘kkan shaxsni jazolamoqchi bo‘lib, uning Spark mashinasi kapotiga chiqib, oynasini oyog‘i bilan tepib sindirgani, so‘ngra mashina egasi voqea joyidan ketib qolgani tasvirlangan.
Ichki ishlar xodimining so‘zlariga ko‘ra, 21-may kuni kechqurun fuqarolar S.Sh. va S.M. oldindan kelishib, ijtimoiy tarmoqdagi profilida “layk”larni ko‘paytirish va obunachilar sonini oshirish maqsadida Urganch shahrida videorolik ishlagan. Ular bir-biriga nisbatan haqoratli so‘zlarni ishlatgan.
Shundan so‘ng, ularga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) bilan ish ochilib, sudga oshirilgan. Sud qarori bilan S.Sh.ga 15 sutka, S.M.ga esa 10 sutka ma’muriy qamoq jazosi tayinlandi.
Eslatib o‘tamiz, yanvar oxirlarida oiladagi zo‘ravonlikni targ‘ib qiluvchi video olgan vaynerlarga sud hukmi o‘qilgandi.
Izoh (0)