Surxondaryo viloyati Termiz shahrida tadbirkorning 608,6 mln so‘mlik dori vositalarini o‘zlashtirgan dorixona mudiri aniqlandi. Bu haqda Prokuratura departamenti xabar berdi.
Unga ko‘ra, holat Bosh prokuratura huzuridagi departamentning Termiz shahri bo‘limi tomonidan tadbirkorlik subyektlarining huquqlarini himoya qilish yuzasidan o‘tkazilgan tergovga qadar tekshiruvda aniqlangan. Fuqaro M.X. “SH.” xususiy korxonasiga qarashli dorixona mudiri vazifasida ishlab kelib, o‘zining moddiy javobgarligidagi dori vositalarining sotuvidan tushgan 608,6 mln so‘mni o‘z ehtiyojlari uchun sarflab yuborib, tadbirkorning mulkini o‘zlashtirish yo‘li bilan talon-toroj qilgan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)