Shunday filmlar borki, ular tomoshabinlar qalbida alohida o‘rin tutadi. Lekin sevimli filmlarimizdan zavqlanar ekanmiz, ba’zan syujet yoki yaratilish tarixining ayrim tafsilotlariga e’tibor bermaymiz. Ammo aynan ular qahramonlarning xarakteri va harakatlari, film voqealari haqidagi tushunchamizni tubdan o‘zgartirishi mumkin.
Kallenlar ko‘proq parilarga o‘xshaydi
“Sumerki” muxlislari Kallenlar vampirlar emas, aslida pari ekanligi haqidagi nazariyani o‘ylab topdi. Mifologiyaga ko‘ra, vampirlar quyosh nuri ta’sirida uchqunlanmaydi — ular yonib, changga aylanadi. Ammo parilar odatda yorqin jonzotlar sifatida tasvirlangan, ayniqsa yorug‘likda.
Boshqa bir dalillarga ko‘ra parilarning ayrim turlari qon bilan oziqlanishi haqiqat. Ular, shuningdek, odamlarga bo‘lgan ishtiyoqi bilan mashhur. Bu Edvardning Bellaga bo‘lgan sevgisini izohlay oladi. Nihoyat vampirlardan farqli o‘laroq, bu qahramonlar superkuchga ega bo‘ladi — Edvard fikrlarni o‘qiy oladi, singlisi Elis esa kelajakni ko‘ra oladi.
Bella Svon yarim bo‘ri bo‘lishi mumkin
“Sumerki” muxlislari orasida yana bir nazariya, Bella qisman bo‘ri ekanligi haqida. Asosiy dalillardan biri shundaki, faqat bo‘rilar ega bo‘lgan aqlbovar qilmaydigan kuch Bellaga vampir bolasini dunyoga keltirishga imkon beradi.
Bu fikrga yana bir dalil bor. Keyinchalik Jeykob Bellaning qizi Renesmida namoyon bo‘ladi. Muxlislarning fikriga ko‘ra, agar qizga bo‘ri geni onasidan o‘tmaganida, u buni qila olmagan bo‘lardi.
Jek hech qachon Rouzga sevgi izhor qilmaydi
“Titanik”ni haqli ravishda kino tarixidagi eng romantik filmlardan biri deb atash mumkin. Garchi Jek Rouzni birinchi ko‘rishdayoq sevib qolganiga shubha qilmasak-da, butun film davomida u hech qachon qizga bo‘lgan sevgisini tan olmagan. Hatto oxirida ikkalasi Atlantika suvlarida muzlab qolganida ham aytmaydi, aksincha Rouzning o‘zi: “Seni sevaman” deydi.
Bu narsa oddiygina tushuntiriladi: Jek o‘z his-tuyg‘ularini xatti-harakatlar orqali ifodalaydiganlardan biri. U har doim birinchi navbatda Rouzga g‘amxo‘rlik qiladi va uni qutqaradi. Eng muhimi, Jek qizni sevishini his qiladi, shu bilan birga unga tanlash erkinligini beradi. Shunday qilib, Rouzning iqroriga javoban, Jek uni hech qachon taslim bo‘lmaslik va keksalikka qadar baxtli yashashga ko‘ndiradi. Jekning asl maqsadi Rouzga uzoq kutilgan erkinligini topishga yordam berish edi.
“Podium” jurnalining ofisi Vogue tahririyatining aniq nusxasi
“Qattiqqo‘l xonim” filmidagi “Podium” jurnalining prototipi dunyoga mashhur Vogue jurnalidir. Tahririyatga kirishga muvaffaq bo‘lgan yagona odam — film prodyuseri Jess Gonchor edi. U Vogue’ning Amerikadagi bosh muharriri Anna Vinturning ofisiga yashirincha kiradi. Keyin u joyni shunchalik o‘xshatib qayta yaratadiki, mish-mishlarga ko‘ra, Anna film chiqqandan so‘ng darhol ofisini ta’mirlatgan.
Severus Sneyp Feniks ordeniga kishi bilmas yordam beradi
“Garri Potter va ajal tuhfasi”da Sneypni ijobiy qahramon deb biladigan Potter muxlislarining fikrini yana bir bor tasdiqlovchi sahna bor. Garri qasrga kirgach, Severus barcha Hogvarts talabalarini yig‘ib, bolani topshirishni talab qiladi. Potterning o‘zi safni buzadi va shu tariqa Sneypga qarshi chiqadi. Professor Makgonagal boshchiligida slizerinliklardan boshqa hamma Garri tomoniga o‘tadi.
Minerva va Severus o‘rtasida duel boshlanadi. Umuman olganda, Sneyp faqat o‘zini himoya qiladi va hech qachon qal’adagilarga qarshi sehr ishlatmaydi. Bu shuni ko‘rsatadiki, Severus Feniks ordeniga yordam berishga harakat qilgan, u hech kim Potterga zarar yetkazishga ulgurmasligi uchun Garrini berishni talab qilgan bo‘lishi mumkin.
“Jodu saltanati” aktyorlariga sehrgarlik o‘rgatilgan
Albatta, “Jodu saltanati” filmida rol o‘ynagan aktyor va aktrisalar sehrgarlikni tom ma’noda o‘rganmagan. Ammo ularning ba’zilari maxsus o‘quv-mashg‘ulotda qatnashishlari kerak edi, ularga sehrli tayoqni qanday harakatlantirish va to‘g‘ri ishlatish kerakligi ko‘rsatilgan.
Kevinni ota-onasi unutib qoldirganining sababi bor
“Uyda yolg‘iz” komediyasining boshida Kevin akasi Bazz bilan janjallashib qoladi. Natijada stoldagi sut pasport va aviachiptalarga to‘kilib ketadi. Hamma narsani tozalashga va hujjatlarni saqlashga uringan ota adashib Kevinning chiptasini bir dasta nam salfetkalar bilan birga axlatga tashlab yuboradi: uning nomi chipta axlat qutisida bo‘lganida ko‘rinadi. Kevin xafa bo‘lib, chordoqqa kirib oladi va uning yo‘qligi faqat parvoz paytida ma’lum bo‘ladi.
Buni oldin hech kim payqamagani endi tushunarli bo‘ldi. Ertalab ota-onalar farzandlarini sanab, qo‘shni bolani Kevin deb adashtiradi. Ammo aeroportda xodim samolyot chiptalari va yo‘lovchilar sonini tekshirganda, nima uchun bitta odam yetishmayotganiga hayron bo‘lmaydi. Axir dadasi Kevinning chiptasini bir kun oldin tashlab yuborganini bilmaydi.
Rik O’Konnellni Leonardo Di Kaprio o‘ynashi mumkin edi
“Mumiyo” va “Mumiyoning qaytishi” filmlari bosh qahramonlaridan biri — sarguzasht izlovchi jasur kapitan Rikni Brendan Freyzer ijro etgan. Biroq Leonardo Di Kaprio uning o‘rnini egallashi mumkin bo‘lgani haqida ma’lumotlar bor: 1-qism suratga olinganida ushbu rolni o‘ynashga Di Kaprio birinchilardan bo‘lib taklif qilingan.
Ularning so‘zlariga ko‘ra, aktyorga ssenariy yoqqan va loyihada ishtirok etishni xohlagan, ammo o‘sha paytda u “Plyaj” filmiga rozilik berib qo‘ygandi. “Plyaj” filmi prodyuserlari Leonardoning “Mumiyo” filmidagi ishni yakunlashi uchun suratga olishni keyinga qoldirish haqidagi iltimosini rad etgani uchun aktyor mazkur filmdan voz kechadi.
Izoh (0)