“O‘zbekiston Respublikasi Madaniy meros agentligining Ilmiy-ekspert kengashi faoliyatini yanada takomillashtirish chora-tadbirlari to‘g‘risida”gi Vazirlar Mahkamasi qarori qabul qilindi.
Madaniy meros agentligining Ilmiy-ekspert kengashi yuridik shaxs hisoblanmaydi va o‘z faoliyatida agentlikka hisobot beradi.
Kengashning asosiy vazifalari quyidagilardan iborat:
- moddiy madaniy meros obyektlarini muhofaza qilish va ulardan foydalanish sohasidagi davlat siyosatining asosiy yo‘nalishlarini amalga oshirish yuzasidan hamda respublika va mahalliy ijro etuvchi hokimiyat organlari, xo‘jalik birlashmalari, shuningdek, nodavlat notijorat tashkilotlarining moddiy madaniy meros obyektlari bilan bog‘liq masalalar bo‘yicha faoliyatini muvofiqlashtirishni yanada takomillashtirish yuzasidan takliflar tayyorlash;
- moddiy madaniy meros obyektlarini muhofaza qilish va ulardan foydalanish jarayonida yuzaga keladigan masalalarni ilmiy jihatdan ko‘rib chiqish, ularni hal etish bo‘yicha ilmiy va amaliy takliflar tayyorlash hamda amalga oshirishda ishtirok etish;
- madaniy meros obyektlarining tarixiy, ilmiy, badiiy yoki o‘zgacha madaniy qiymatiga salbiy taʼsir qilmasligini taʼminlash maqsadida ulardan foydalanish maqsadlari va shartlarini tasdiqlash yoki yetarli darajada asoslantirgan holda tasdiqlashni rad etishga doir masalalar yuzasidan xulosalar berish va boshqalar.
Kengash tarkibi Vazirlar Mahkamasi tomonidan tasdiqlanadi. Agentlik direktorining birinchi o‘rinbosari Kengash raisi hisoblanadi. Kengash faoliyatiga davlat organlari va tashkilotlarning mansabdor shaxslari aralashuviga yo‘l qo‘yilmaydi. Kengashni moddiy-texnik jihatdan taʼminlash agentlik tomonidan qonunchilik hujjatlarida taqiqlanmagan manbalar hisobidan amalga oshiriladi.
Hujjat bilan quyidagilar tasdiqlandi:
- Madaniy meros agentligining Ilmiy-ekspert kengashi to‘g‘risidagi nizom;
- Madaniy meros agentligining Ilmiy-ekspert kengashi tarkibi.
Hujjat bilan O‘zbekiston hukumatining ayrim qarorlari o‘z kuchini yo‘qotgan deb topildi. Hujjat Qonun hujjatlari maʼlumotlari milliy bazasida eʼlon qilingan va 2024-yil 21-maydan kuchga kirdi.
Avvalroq Buxoroda yodgorliklarni ta’mirlashga ajratilgan 3,3 milliard so‘m talon-toroj qilingani, Namangandagi arxeologiya yodgorligi hududida uy qurish uchun qabrlar buzilib, 6,9 milliard so‘m zarar yetkazilgani to‘g‘risida xabar berilgandi.
Izoh (0)