G‘azo shimolidagi Jabaliya qochqinlar lagerida HAMAS tomonidan asirga olingan 3 nafar isroillik jasadi topildi. Bu haqda Yaqin Sharq manbalariga asoslanib, CNN nashri xabar berdi.
Jasadlar Jabaliya shimoliy qismidagi qabrlardan topilgan. Ular Isroil askarlarining maxsus reydi davomida aniqlangan.
Har uchala mahbus ham 7-oktyabr kuni Isroilning G‘azo bilan chegarasi yaqinidagi Mefalsim chorrahasida o‘ldirilgani aytilgan. Keyinchalik esa ularning jonsiz tanalari HAMAS tomonidan anklavga olib ketilgani xabar berilgan.
Isroil mudofaa kuchlari Isroil fuqarolari bo‘lgan Xanan Yablonka, Mishel Nisenbaum va Orion Ernandeslar jasadlari G‘azodan olib chiqilganini xabar qilgan. Marhumlarning oila aʼzolariga holat yuzasidan maʼlumot berilgan.
Isroil askarlari jasadlarni aniqlash reydi davomida HAMAS aʼzolari bilan faol otishma yuz berganini yozgan. Biroq Yaqin Sharq nashrlarining hech biri bu xabarni tasdiqlamagan.
Isroil hukumati 7-oktyabr voqealarida 1200 nafarga yaqin isroillik o‘ldirilgani va 250 dan ortiq fuqaro o‘g‘irlab ketilganini aytib keladi. Isroil bosh vaziri kabineti mahbuslarning 37 nafari halok bo‘lganini rasman tasdiqlagan. 121 nafar fuqaro “Al-Qassam” brigadalari qo‘lida qolayotgani maʼlum qilingan. Isroil mahbuslarning ko‘pchiligi vafot etgan deb hisoblaydi.
Izoh (0)