Futbol bo‘yicha Yevropa Ligasining finalida “Atalanta” va “Bayer” 22-may, chorshanba kuni o‘zaro to‘qnash keladi. Dublinda bo‘lib o‘tadigan uchrashuvga oid ma’lumotlar va qiziqarli faktlar taqdim etiladi.

Irlaniya. Dublin. “Dublin Arena”

22-may, chorshanba

“Atalanta” –“Bayer” 00:00

Bosh hakam: Ishtvan Kovach (Ruminiya)

“Atalanta”

Bergamoliklar o‘z tarixidagi ilk Yevrokubok finaliga yaxshi formada yetib keldi. Jan Pyero Gasperini shogirdlari uikendda “Lechche”ni 2:0 hisobida taslim etdi va A Seriyada o‘ziga 5-o‘rinni kafolatladi. Agarda jamoa Dublindagi finalda g‘alaba qozonsa, keyingi mavsum uchun Chempionlar Ligasi yo‘llanmasini ham qo‘lga kiritishi mumkin.

Biroq klub va uning muxlislarini Italiya Kubogida “Yuventus”ga boy berilgan imkoniyat (0:1) xafa qildi. Turinliklar ustozi Massimiliano Allegri esa sovrin yutgan holda iste’foga chiqib ketdi. 

“Atalanta” bosh murabbiyi ham Yevropa Ligasi finalidan so‘ng jamoani tark etishi mumkin. Italiya nashrlari so‘nggi paytlar Gasperinini “Napoli” bilan “bog‘lamoqda”.

Finalga bergamoliklar bir necha muammolar bilan tashrif buyuradi. Katta ehtimol bilan jamoaga de Ron, Kolashinats va Holmlar yordam bera olmaydi.

“Atalanta”ning Dublindagi finalga qadar bosib o‘tgan yo‘li haqida videoni tomosha qiling:

“Bayer”

Nemis klubi mavsumning eng kutilmagan voqeasini — mag‘lubiyatsiz seriyani davom ettirmoqda. “Bayer” Bundesliganing so‘nggi turida “Augsburg”ni 2:1 hisobida taslim etdi va chempionatni birorta mag‘lubiyatsiz yakunladi. 

Xabi Alonso shogirdlari boshqa turnirlarda ham omadsizlik nimaligini bilmay kelmoqda. Jamoani oldinda 2 ta final kutib turibdi — dastlab, Yevropa Ligasi, keyin esa Germaniya Kubogi finali. 

“Bayer” finalga hech qanday yo‘qotishlarsiz tashrif buyurmoqda. Yosh iqtidor Florian Virtsning sog‘ligida muammolar bor edi, ammo shifokorlar unga maydonga tushishga ruxsat bergan. “Augsburg”ga qarshi o‘yinda Alonso bir necha muhim futbolchilariga dam berdi. 

Bu esa “Bayer”ning ishtiroki haqidagi videolavha:

O‘yin oldidan qiziqarli faktlar:

• “Bayer” mavsum davomida 51 ta o‘yindan buyon (42 ta g‘alaba va 9 ta durang) mag‘lubiyat nimaligini bilmayapti;
• Leverkuzenliklar Yevropa Ligasida ketma-ket 13 o‘yindan buyon (9 ta g‘alaba va 4 ta durang) mag‘lub bo‘lmayapti;
• “Atalanta” Yevropa Ligasi doirasida safardagi o‘yinlarda 9 o‘yinlik mag‘lubiyatsiz seriya namoyish etmoqda.

“Atalanta” — “Bayer” o‘zaro o‘yinlar tarixiga nazar: 

Bunga qadar jamoalar Yevrokuboklarda bir marta to‘qnash kelgan. 2021/22-yilgi Yevropa Ligasi 1/16 finalida o‘zaro bahs olib borgan va unda “Atalanta” ikkala o‘yinda ham g‘alaba qozongan (o‘z uyida 3:2, Leverkuzenda 1:0). Bergamoliklar safida gol urgan futbolchilar hozir klubda to‘p surmaydi — Malinovskiy, Muriel va Boga. “Bayer”dagi gollarni urgan Diabi va Arangislar ham hozir klub sharafini himoya qilmaydi. 

Murabbiylarning o‘yin oldi fikrlari

Ketma-ket 3 oy davomida har uch kunda o‘yin o‘tkazish juda qiyin. Juda ko‘p yaxshi o‘yinlar o‘tkazdik. “Yuventus”ga qarshi Italiya Kubogi finali biz uchun omadsiz kechdi. Biroq oldimizda yana bir final turibdi.

Buyuk jamoaga qarshi o‘ynaymiz. Raqamlar va bu mavsumdagi ko‘rsatkichlar barchasini aytib turibdi. Lekin biz Italiyada va xalqaro o‘yinlarda kuchli jamoalarga qarshi doim o‘ynab kelganmiz. O‘zimizga bo‘lgan ishonch yuqori.

Jan Pyero Gasperini, “Atalanta” bosh murabbiyi

O‘yinga tayyorgarlik ko‘rdik va hech narsani o‘zgartirmadik. 51 o‘yinlik mag‘lubiyatsiz seriya haqida ko‘p gapirildi, bu yaxshi, albatta. Endi esa oldimizda turgan 2 ta o‘yinni ham yutishimiz lozim.

O‘tgan mavsum yarim finaldagi mag‘lubiyat bizga katta motivatsiya berdi. Finalga yaqin kelgandik. Final bahsiga esa g‘alaba uchun tushiladi. So‘nggi qadamli tashlashga tayyormiz. 

Juda yosh mutaxassis edim, “Bayer” menga ish taklif qilganida bundan nimadir chiqishiga ham ishonmaganman. Atigi bir yarim yil o‘tgan bo‘lsa-da, biz juda ko‘p to‘g‘ri qarorlarni qabul qildik. Bu vaqt davomida fantastik xarakter namoyish eta oldik.

So‘nggi daqiqalarda ham gol ura olishimizni bilamiz. Bu mavsumda jamoa juda katta o‘sishga erishdi.

Xabi Alonso, “Bayer” bosh murabbiyi

“Atalanta” va “Bayer” o‘rtasidagi uchrashuv O‘zbekiston vaqti bilan 22-maydan 23-mayga o‘tar kechasi 00:00 da start oladi.