Telegram messenjeridagi kanallarda Qashqadaryo viloyatining Qamashi tumanidagi kasb-hunar kollejlaridan birining binosida pilla boqilayotgani tasvirlangan video tarqaldi. “Daryo” mazkur holatga izoh olish maqsadida mas’ullar bilan bog‘landi.
Kollej direktori Shuhrat Sultonovning aytishicha, kollej shu tarzda pilla rejasini bajarmoqda.
Kollejimiz Suv xo‘jaligi vazirligiga qarashli Suv xo‘jaligi va melioratsiya kolleji hisoblanadi. 750 o‘ringa mo‘ljallangan. Ammo ayni kunda ta’lim muassasamizda 176 nafar o‘quvchi o‘qiydi. Aksariyat xonalarimiz bo‘sh va jihozsiz. Shu sabab bo‘sh turgan xonalardan foydalanib, daromad qilish, belgilangan rejani bajarish uchun pilla boqqan edik, — deydi kollej direktori.
Mas’ulning ma’lumot berishicha, kollejning 25 gektar yerga egalik qiluvchi yordamchi xo‘jaligi ham mavjud bo‘lib, unda, asosan, mavsumiy ishchilar faoliyat yuritadi.
Pilla qurtini shu yordamchi xo‘jalikdagi xodimlarimiz parvarish qiladi. O‘quvchilar tahsil oluvchi bino bu binodan alohida joylashgan bo‘lib, pilla boqish dars jarayonlariga xalal bermaydi, — deydi Shuhrat Sultonov.
Ayni kunda 8 ta yo‘nalish bo‘yicha o‘quvchilarga tahsil beruvchi kollej direktorining bildirishicha, ta’lim dargohi joriy mavsumda 168 kilo pilla topshirishi kerakligi belgilangan.
Aynan daromadimiz qancha, aniq bilmayman. Hozir yodimda yo‘q, — deydi pilla yetishtirishdan daromad qilishini aytgan kollej rahbari.
Izoh (0)