Gilos juda ham shirin va foydali meva ekanligi hech kimga sir emas. Ko‘pincha uni yangi uzib olingani iste’mol qilinadi, chunki undan tayyorlangan murabbo va boshqa ko‘rinishdagi pishiriqlarda gilos o‘zining mazasi va foydali xususiyatlarini yo‘qotadi.
Gilos hajmi kichik bo‘lgani uchun uni rezavor deb atashadi, aslida esa gilos meva hisoblanadi. Rezavorlarda esa qoidaga ko‘ra bir emas, bir nechta urug‘ bo‘lishi lozim.
Gilosning foydali tomonlari
Gilos antioksidantlar manbayi bo‘lib, tarkibida polifenollar, melatonin, karotenoidlar, E va C vitaminlari mavjud bo‘lib, ular tanani hujayralarga zarar yetkazadigan erkin radikallardan va bir qancha kasalliklardan himoya qiladi. Tadqiqotlar shuni ko‘rsatadiki, gilos surunkali yallig‘lanish asoratlarini sezilarli darajada kamaytiradi. Gilos tarkibidagi polifenollar artrit, qand kasalligi, saraton va gipertoniya kabi kasalliklarning oldini olishi mumkin.
Ma’lumotlarga ko‘ra, gilos II turdagi qandli diabetga chalinganlar uchun ideal uglevod manbayi hisoblanadi. Uning glikemik indeksi past bo‘lgani sababli gilos qondagi shakar miqdorining ko‘tarilishiga olib kelmaydi. Shuningdek, gilos ruhiy salomatlik uchun ham foydali meva bo‘lib, kortizol miqdorini pasaytiradi va kayfiyatni ko‘taradi.
Bundan tashqari, amerikalik olimlar gilos iste’moli bilan saraton rivojlanishining pasayishi o‘rtasida bog‘liqlikni aniqladi. Xususan, gilos mevasi oshqozon osti bezi, ko‘krak, jigar, yo‘g‘on ichak, teri va o‘pka saratoniga chalinish ehtimolini kamaytiradi. Bunga gilos tarkibidagi perillil spirti va fenol birikmalar sababchidir.
Gilos parhez qilayotganlar uchun ideal tamaddi bo‘la oladi. 100 gramm gilosda atigi 70 kilokaloriya mavjud. Ushbu mevada ko‘p uchraydigan pektin moddasi oshqozon-ichak tizimining sog‘lom ishlashi uchun muhim elementdir. U tabiiy enterosorbent, shuningdek, ichak mikroorganizmlari uchun zarur bo‘lgan prebiyotiklar manbayidir.
Gilosni qisqa vaqtda muzlatish yoki unga shakar qo‘shib murabbo tayyorlash mevaning barcha foydali jihatlarini yo‘qqa chiqaradi.
Gilosning zararli tomonlari
Gilosni tanovul qilish quyidagi holatlarda tavsiya etilmaydi:
- allergiya;
- ichak kasalliklari;
- oshqozon va oshqozon osti bezi kasalliklari;
- individual to‘g‘ri kelmaydigan holatlarda.
Bir kunda qancha miqdorda gilos iste’mol qilish mumkin?
JSST va professional tibbiyot birlashmalari mutaxassislari har kuni turli sabzavot va mevalarni iste’mol qilishni maslahat beradi. Shu tufayli gilosni ham istisno holatlardan tashqari har kuni taxminan 200 gramm miqdorda yeyish mumkin. Tavsiya etilgan kunlik me’yorga amal qilinmasa, ortiqcha gilos meteorizm va diareyani keltirib chiqarishi mumkin.
Izoh (0)