Gollivudning mashhur oilalari ham boshqalardan farq qilmaydi. Agar oilada ota yoki ona mashhur bo‘lsa, katta ehtimol bilan ularning farzandi ham filmlarda ishtirok etadi. Biroq bu bolalar muvaffaqiyatga qanday erishadi? Ba’zilar o‘zlarini isbotlash uchun familiyasini o‘zgartiradi, ota-onasining shon-shuhratiga suyanmaydi. Boshqalari esa tanish-bilish va familiyadan faol foydalanadi.
Spilberglar oilasi
Gollivudning eng mashhur rejissyorlaridan biri qiziga karyerasidagi ilk qadamlarini qo‘yishiga yordam bermoqda. Destri Spilberg (Stiven Spilberg va uning ikkinchi rafiqasi, aktrisa Keyt Kepshouning qizi) “Buning haqiqatligini bilaman” (2020) va “Qizilmiyali pitssa” (2021) filmlarida ikkinchi darajali rollarni ijro etish bilan boshlagan. Bir muncha vaqt u otasining filmlarida prodyuser yordamchisi va rekvizit bo‘yicha texnik bo‘lib ishlaydi. Keyinchalik esa rejissyor bo‘lishga qaror qiladi. Destri o‘zining birinchi qisqa metrajli “Rozi” filmini 2019-yilda suratga olgan.
Keyingi qisqa metrajli “O‘zimga qo‘yib bering” (2022) filmi ko‘plab tanqidlar va tanish-bilishchilikka yo‘l qo‘yilgan holatlar bo‘yicha ayblovlarga sabab bo‘ladi: chunki ssenariyni Ouen King (Stiven Kingning o‘g‘li) yozgan, bosh rolni esa Hopper Penn (Shon Penning o‘g‘li) o‘ynagan. Natijada Destri o‘zini oqlamoqchi bo‘ladi, biroq keyinroq tvitlarini o‘chirib tashlaydi va ijod qilishda davom ettiradi. Uning Mishel Dokeri va Jankarlo Esposito ishtirokidagi debyut badiiy filmi “Iltimos, bolalarni ovqatlantirmang” hozirda premyera va prokatga tayyorlanmoqda.
Depplar oilasi
Lili-Rouz Depp ota-onasidan (aktyor Jonni Depp va aktrisa Vanessa Paradis) tabiiy joziba va iste’dodni meros qilib olgan. Bu fazilatlar qizga modellik biznesida karyera qurishga va Chanel moda uyining yuzi bo‘lishga yordam beradi. Ammo ota-onasidan o‘tgan gen o‘z kuchini ko‘rsatdi. Lili-Rouz kinodagi debyutini Kevin Smitning “Qoziq tish” (2014) filmidagi kichik rol bilan qilgan. 2016-yildan 2018-yilgacha u uchta fransuz filmida kichik rollarni ijro etgan. Keyingi rollari haqiqiy mashhurlik olib keladi, shundan so‘ng prodyuserlar yangi aktrisaga jiddiy e’tibor qaratadi.
2023-yil may oyida Kann kinofestivalida “Kumir” serialining premyerasi bo‘lib o‘tdi, unda Lili-Rouz reper The Weeknd bilan birga bosh rolni o‘ynadi. Garchi shou birinchi mavsumdan keyin bekor qilingan bo‘lsa-da, Time jurnali aktrisaning iste’dodini qayd etadi. Muvaffaqiyatsiz loyiha Lili-Rouzning qat’iyatiga ta’sir qilmadi, aktrisa hozirda ham ijod qilishda davom etmoqda.
Jonsonlar oilasi
Birinchi marta Dakota Jonson (aktyor Don Jonson va aktrisa Melani Griffitning qizi, aktrisa Tippi Hedrenning nabirasi) “Qoidalarsiz ayol” (1999) komediyasida suratga tushadi. U o‘gay singlisi Stella bilan birgalikda bosh qahramon Melani Griffitning qizlari rolini o‘ynagan, rejissyor esa Dakotaning o‘gay otasi Antonio Banderas edi. Mango va Wish brendlarida qisqa vaqt modellik qilgandan so‘ng Dakota kino olamiga qaytib keladi va klassik sitkomlarda kichik rollarda ishtirok etadi.
Aktrisa rol o‘ynagan E.L.Jeyms romanining filmga moslashuviga ko‘pchilik tanqidchilar salbiy munosabat bildirgan bo‘lsa-da, ba’zi jurnalistlar Jonsonning ijrosini yuqori baholaydi. Shundan so‘ng Jonsonning yulduzlik davri boshlanadi va yuqori darajadagi yulduzlar: Jonni Depp, Tilda Suinton, Ralf Fayns, Bryus Dern va boshqalar bilan birgalikda rol o‘ynaydi.
Rassellar oilasi
-UCOEyJ-u.webp)
Aktyorlar Kurt Rassell va Goldi Houn Gollivudga nafaqat Keyt Hadson (Houn va musiqachi va aktyor Bill Hadsonning qizi), balki shou-biznes osmonida endigina charaqlayotgan Uayt Rassellni ham hadya qilgan. Uayt xokkey bilan shug‘ullanib, darvozabon sifatida ko‘plab havaskor va professional jamoalarda o‘ynaydi, ammo 2010-yilda jiddiy jarohatlar tufayli faoliyatini tugatishga majbur bo‘ladi. Shundan keyin Uayt Rassel o‘zini filmlarda sinab ko‘rishga qaror qiladi.
Har xil jangovar filmlardagi kichik rollar va “Qora oyna” epizodlaridan birida ishtirok etganidan so‘ng, yosh aktyorga nihoyat jiddiy loyiha ishonib topshiriladi. Uaytt Yuliy Averi tomonidan amerikalik dengiz piyodalari va natsistlar o‘rtasidagi qarama-qarshilik haqidagi “Overlord” (2018) tarixiy filmida bosh rolni ijro etadi. Film tomoshabinlar va tanqidchilarning hayratiga sazovor bo‘ladi. Shundan so‘ng Rassell “Lochin va qishki askar” (2021) filmida suratga tushadi va Jon Uoker rolini o‘ynaydi. Yaqinda Apple TV+ va Legendary Television hamkorlikda suratga olgan “Monarx: maxluqlar avlodi” (2023) serialida Uaytt otasi Kurt Rassell bilan birgalikda rol o‘ynaydi — filmda u otasining yoshligini gavdalantiradi.
Andersonlar oilasi
Ever Gabo Anderson — mashhur aktrisa Mila Yovovich va rejissyor Pol Andersonning qizi. Ever onasining izidan borgan va to‘qqiz yoshida Vogue Bambini jurnalining muqovasi uchun suratga tushgan. Keyinchalik u Karl Lagerfeld, Mikael Jansson va Piter Lindberg bilan hamkorlik qiladi, ammo u o‘zining modellik karyerasidan qoniqmaydi. Ota-onasi Everni aktyorlikdan qaytarishga harakat qiladi, lekin u o‘z so‘zida qat’iy turib oladi.
2016-yilda Pol Anderson suratga olgan saganing oltinchi filmi chiqadi, filmda Ever Alisiya Markusning bolaligini o‘ynagan. Onasi Mila Yovovich esa ulg‘aygan Markus rolini ijro etadi. Marvel prodyuserlari bu yondashuvni qadrlaydi va Everni “Qora beva” filmidagi (2021) yosh Natasha Romanoff rolini o‘ynashga taklif qilishadi. Hozircha Devid Lourining “Piter Pen va Vendi” (2023) ertagi yangi versiyasi Ever ishtirok etgan so‘nggi loyiha hisoblanadi.
Izoh (0)