Namangan viloyatining Mingbuloq tumanidagi fermer xo‘jaliklaridan birining rahbari uzoq yillardan beri ishlab kelayotgan mexanizatoriga avtomobil sovg‘a qildi. Bu haqda “Daryo” muxbiri Azizbek Abduvaliyev xabar bermoqda.
Bahodir Chilmatov rahbar bo‘lgan “Fayzimuhammad ota Ch” fermer xo‘jaligida 747 gektar maydonda paxta, g‘alla va boshqa ekinlar yetishtirib kelinadi. Xo‘jalikning turli rusumdagi 24 ta qishloq xo‘jaligi texnikasi bor.
Ulardan birini mexanizator Sobirjon Ergashev 20 yildan beri boshqarib kelayotgan edi. Fermer o‘z xodimiga Onix avtomobilini sovg‘a qilishga qaror qildi. Sovg‘ani tumanda dala ishlarining borishi bilan tanishayotgan viloyat hokimi Shavkat Abdurazzoqov topshirdi.
“Fermerlarimiz orasida bu o‘ziga xos anʼanaga aylanib boryapti. Oldinroq uchqo‘rg‘onlik dongdor fermerimiz Gulxumor opa mexanizatorlariga Damas avtomobillari olib berib, umra ziyoratlariga jo‘natganlari haqida eshitgandim. Bu xayrli ish endi Mingbuloqda amalga oshayotgan ekan, avtomobil egasiga buyurib nasib etsin”, — dedi Shavkat Abdurazzoqov.
Sobirjon Ergashev 54 yoshda, uch farzandning otasi, to‘rt nabiraning bobosi. Aytishicha, shu paytgacha oilasida shaxsiy avtomobil bo‘lmagan. Mexanizator Onix mashinasini minib kelgani u istiqomat qiladigan “Qo‘g‘oliko‘l” mahallasida bayramga aylanib ketdi.
Izoh (0)