O‘zbekistondagi 15 ta zapravkada sifatsiz benzin sotilgani aniqlandi. Bu haqda Raqobatni rivojlantirish va iste’molchilar huquqlarini himoya qilish qo‘mitasi xabar berdi.
Qayd etilishicha, AYQSHlarda sotilayotgan yonilg‘ilarning ba’zilari standart talablarga mos emasligi oqibatida avtomobil dvigatellarining nosoz holatga kelayotgani haqida minglab shikoyatlar kelib tushmoqda. Shuningdek, ushbu mavzu ijtimoiy tarmoqlarda ham aholi o‘rtasida keng muhokamalarga sabab bo‘lmoqda.
Qo‘mita 2024-yilning yanvar—aprel oylari davomida “O‘zenergoinspeksiya” bilan hamkorlikda mazkur holat yuzasidan respublikaning 50 ga yaqin avtomobillarga yonilg‘i quyish shoxobchalarida sotilayotgan benzinlarning sifatini o‘rganish uchun nazorat xaridini o‘tkazdi.
Laboratoriya tahlillari xulosasiga ko‘ra, Ai-92 va Ai-95 markali sotilgan sifatsiz benzinlar 15 ta AYQSHlarga tegishli ekani ma’lum bo‘ldi.
Samarqand viloyatida 12, Farg‘ona, Surxondaryo, Namangan viloyatlarida esa bittadan xizmat ko‘rsatuvchi shoxobchalarda shunday benzin sotilgani aniqlangan.
Uning oqibatida iste’molchilarga 201 million so‘mdan ortiq zarar yetkazilgan.
Qo‘mitaning hududiy organlari tomonidan iste’molchilarga yetkazilgan zararni qoplash maqsadida 15 ta xo‘jalik yurituvchi subyektga nisbatan o‘rnatilgan tartibda ish qo‘zg‘atilib, bajarilishi lozim bo‘lgan ko‘rsatmalar berilgan. Ushbu ko‘rsatmalar natijasida 2139 nafar iste’molchining huquqlari tiklanib, ularning foydasiga tegishli tartibda pul mablag‘lari qayta hisob-kitob qilib berilishi ta’minlangan.
Izoh (0)