Moskva davlat universiteti Ijtimoiy tarmoqlarda urushni qoralovchi postlar qoldirgan ukrainalik talabani o‘qishdan chetlatdi. Bu haqda The Moscow Times nashri xabar berdi.
Xabarda keltirilishicha, talaba Sergiy Gulko urushga qarshi postlari uchun muqaddam bir necha bor hibsga olingan va tushuntirishlardan so‘ng qo‘yib yuborilgan. U ayni damda Moskva davlat universitetining bakalavr bosqichida tahsil olayotgani ma’lum qilingan.
Aprel oyi boshidan beri Sergiy Gulko bir qator qonunbuzarliklarda ayblangan. U Ukrainani qo‘llovchi, urushni qoralovchi va ekstremistik mazmundagi chaqiriqlar bilan chiqqani maʼlum qilingan.
Talaba ijtimoiy tarmoqdagi Ukrainaga qarshi keng ko‘lamli urush uchun Moskvani bombardimon qilishga chaqiruvchi postlari sabab avvalroq 12 sutka qamoq jazosiga hukm qilingan. 26-aprel kuni esa Moskva sudi talabani deportatsiya qilish haqida qaror chiqargan.
Rossiya qo‘shinlari shahrimni vayron qildi, ular mamlakatimga o‘t ochdi. Oqibatda yaqinlarim halok bo‘ldi, — degan Gulko qoldirgan postlarida.
“Mediazona” Gulko deportatsiyani kutayotgan muhojirlar uchun mo‘ljallangan hibsxonaga joylashtirilgani haqida xabar berdi. Qator manbalar u Gruziyaga deportatsiya qilinishi haqida yozgan.
Izoh (0)