Ijtimoiy tarmoqlarda Samarqanddagi mahallalarning birida kotlovan qazish jarayonida qo‘shni uy qulab tushgani haqida xabarlar tarqalgach, holat yuzasidan jinoiy ish ochildi. Qurilish vazirligi yangi tafsilotlarni ochiqladi.
Ma’lum qilinishicha, fuqaro B.Isroilovga tegishli bo‘lgan Samarqand ko‘chasidagi 26-uyni rekonstruksiya qilish hamda o‘z hududidan qo‘shimcha bino va inshootlarni qurishga Past Darg‘om tumani Qurilish va uy-joy kommunal xo‘jaligi bo‘limining 2024-yil 20-yanvardagi ruxsatnomasi berilgan.
Mazkur hujjatga asosan Samarqand viloyati Qurilish va uy-joy kommunal xo‘jaligi bosh boshqarmasi tomonidan 2024-yil 2-fevralda arxitektura rejalashtirish topshirig‘i ishlab chiqilgan. “Mezana Proyekt” MCHJ tashkiloti tomonidan ishlab chiqilgan loyiha hujjati Samarqand viloyati Qurilish va uy-joy kommunal xo‘jaligi boshqarmasi loyiha-smeta hujjatlarini kelishish bo‘yicha arxitektura va shaharsozlik kengashi ishchi organining 2024-yil 4-martdagi xulosasi bilan kelishib berilgan.
“Mezana Proyekt” MCHJ ishlab chiqqan loyiha hujjati Shaharsozlik hujjatlarini ekspertiza qilish respublika markazi Samarqand viloyati filiali tomonidan ko‘rib chiqilib, 2024-yil 26-martda ekspertiza xulosasi olingan.
Samarqand viloyati Qurilish va uy-joy kommunal xo‘jaligi sohasida hududiy nazorat qilish inspeksiyasidan obyektda qurilish-montaj ishlarini boshlash uchun ro‘yxatdan o‘tkazilgan.
O‘rganish jarayonida fuqaro B.Isroilov tomonidan o‘zboshimchalik bilan “Mezana Proyekt” MCHJ tomonidan ishlab chiqilgan loyiha hujjatlariga amal qilmasdan, poydevor quyish uchun yer qazish ishlarini olib borganligi sababli qo‘shni xonadon poydevori ostidagi tuproqning cho‘kishi natijasida turar joyning bir qismi qulab tushgani aniqlandi.
Mazkur holat yuzasidan soha vakillaridan iborat ekspertlarning o‘rganish natijalariga oid xulosasiga asosan yana qo‘shimcha ma’lumot taqdim qilinishi aytildi.
Izoh (0)