Farg‘onada “Hizb at-tahrir al-islomiy” diniy ekstremistik oqimning faol a’zosi bo‘lgan A.A. 12 yilga ozodlikdan mahrum etildi. Bu haqda Oliy sud matbuot xizmati xabar berdi.
Ma’lum qilinishicha, Oltiariq tumanida yashovchi ushbu fuqaro Rossiyada ishlab yurgan vaqtida islom diniga qiziqishi tufayli internet orqali turli ma’ruzalarni eshitgan. Xususan, u “Hizb at-tahrir al-islomiy” diniy terroristik tashkiloti tarafdorlarining O‘zbekistonda mavjud amaldagi tuzumni Konstitutsiyaga xilof ravishda o‘zgartirishga xizmat qilishga qaratilgan ma’ruzalaridagi aqidaparastlik g‘oyalari bilan yo‘g‘rilgan video va audio materiallarni eshitib, ularning ta’sirida ekstremistik g‘oyalarni qo‘llab-quvvatlab kelgan.
U Telegram orqali oqim tarafdori M. A. bilan yozishmalar olib borgan. “Hizb at-tahrir al-islomiy” diniy ekstremistik oqimiga a’zo bo‘lib, ularning kitoblaridan virtual ta’lim olgan. Buning natijasida diniy aqidaparastlikka berilib, uning g‘oyalarini qo‘llab-quvvatlagan. Mazkur diniy tashkilotga sodiqlik qasamyodini qabul qilgan va oylik daromadidan a’zolik badali to‘lab kelgan. Shu bilan birga ijtimoiy tarmoqlarda diniy oqimning g‘oyalarini faol targ‘ib qilgan.
Oltiariq tumaniga qaytib kelgach, Telegram’da turli guruhlarni tashkil qilgan hamda o‘zining tanishlarini shu guruhga qo‘shgan. Guruhda A.A. aqidaparastlik g‘oyalaridan saboq berib kelgan hamda diniy oqimning materiallarini tarqatgan.
Huquqni muhofaza qiluvchi idoralar tomonidan o‘tkazilgan tezkor tadbirlar davomida uning qilmishlari fosh bo‘lgan. Telefonidan olingan ashyoviy dalillar diniy oqimning materiallari ekanligi tasdig‘ini topgan.
Jinoyat ishlari bo‘yicha Bag‘dod tuman sudi hukmiga ko‘ra, unga 12 yil ozodlikdan mahrum etish jazosi tayinlangan.
Izoh (0)