Farg‘onada 10 ming dollar evaziga Koreyaga o‘qishga va ishga yuborishni va’da qilgan firibgar ushlandi

Farg‘ona viloyatida Koreya davlatiga o‘qishga va ishga yuborishni va’da qilgan firibgar ushlandi. Bu haqda Prokuratura departamenti xabar berdi. 

Ma’lum qilinishicha, holat Bosh prokuratura huzuridagi departamentning Marg‘ilon shahar bo‘limi tomonidan DXX xodimlari bilan hamkorlikda o‘tkazilgan tezkor tadbirda aniqlangan. Fuqaro A.X. fuqaro M.E.ning ishonchiga kirib, uning farzandini 10 000 AQSH dollari evaziga Koreya davlatiga o‘qishga va ishga yuborishini va’da qilib, oldindan 3 000 AQSH dollarini olgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.