Super og‘ir vazn toifasida WBA Super, IBF, WBO va IBO kamarlari sohibi Oleksandr Usik va WBC chempioni Tayson Fyuri mutlaq jahon chempionligi uchun jang qiladi.
Oradan 25 yil o‘tib, og‘ir vazn toifasida mutlaq jahon chempioni aniqlanadi. 1999-yilda xuddi shunday jangda Lennoks Lyuis Evander Holifildni mag‘lub etgandi.
Fyuri va Usik o‘rtasidagi jang 18-may kuni Saudiya Arabistonida bo‘lib o‘tadi. Aslida shbu jang 17-fevral sanasida bo‘lib o‘tishi lozim edi. Biroq, Tayson sparring vaqtida qoshidan olgan jarohat tufayli sana o‘zgargan.
35 yoshli Tayson Fyuri o‘zining so‘nggi jangini o‘tgan yilning oktyabr oyida kamerunlik MMA jangchisi, sobiq UFC chempioni Frensis Ngannuga qarshi o‘tkazib, hakamlarning qarori bilan g‘alaba qozongan edi. Ukrainalik Oleksandr Usik esa o‘tgan yilning avgustida britaniyalik Daniel Dyubuani 9-raundda texnik nokautga uchratib, o‘z kamarini majburiy da’vogardan himoya qilgandi.
18-may kuni bo‘lib o‘tadigan turnir bo‘yicha yana qanday ma’lumotlar bor?
Turnir doirasida quyidagi janglar o‘tkaziladi.
- Mairis Briedis (28-2) – Jay Opetaya (24-0);
- Jo Kordina (17-0) – Entoni Kakache (21-1);
- Sergey Kovalev (35-4-1) – Robin Safar (16-0);
- Mark Chemberlen (15-0) – Joshua Oluvaseun Vahab (23-1);
- Frenk Sanches (24-0) – Agit Kabayel (24-0);
- Daniel Lapin (9-0) – Oktavio Pudivitr (9-1).
Joy — Saudiya Arabistonining Kingdom Arena stadioni. Aynan shu stadionda Fyuri Ngannuga qarshi ringga ko‘tarilgandi va g‘alaba qozongan edi. Shuningdek, Dmitriy Bivol, Entoni Joshua va Deontey Uaylder ishtirokidagi turnir bo‘lib o‘tgan.
Jangni O‘zbekistonning hech bir kanali translyatsiya qilmaydi. ESPN+ da jonli tomosha qilish mumkin bo‘ladi.
Izoh (0)