Fotoqopqonlar kamerasiga tuz bilan oziqlanayotgan morxo‘r takasi muhrlandi, deb xabar bermoqda Surxondaryo viloyati Ekologiya boshqarmasi.
Tasvirlarda Ekologiya vazirligi tasarrufidagi “Surxon” davlat qo‘riqxonasida o‘tkazilgan biotexnik tadbirlar davomida qo‘yilgan tuz bo‘laklarini morxo‘rlar galasi yalayotgan jarayoni qayd etilgan.
Morxo‘r O‘zbekiston Qizil kitobiga hamda Xalqaro TMXI Qizil ro‘yxatiga kiritilgan, yo‘qolib ketish yoqasida turgan, lokal kenja turdir. Uning boshqa hayvonlardan yaqqol farqli ko‘rinishi bu ularning yoshi katta takalaridagi buralgan katta va uzun (90-100 sm) shoxlaridir.
Morxo‘r so‘zining maʼnosi forscha “mor – ilon, xo‘r – yeyish”, yaʼni “ilon yeyuvchi hayvon” degan maʼnoni anglatadi. Lekin morxo‘rlarning bunday nomlanishiga ularning katta buralgan ko‘rinishidan ilonni eslatuvchi shoxlari sababchi bo‘lishi ham mumkin.
Hozirgi kunga kelib Surxon davlat qo‘riqxonasidagi morxo‘rlarning soni oxirgi sanoq natijalariga ko‘ra 673 boshni tashkil qilmoqda.
Izoh (0)