Rossiya armiyasi 14-may kuni yangi hujumlar boshlashi ortidan minglab fuqarolar Ukrainaning Xarkov viloyatidan evakuatsiya qilindi. Bu haqda Xarkov viloyati rahbariyati eʼlon qilgan xabarga asoslanib, The Moscow Times nashri xabar berdi.
Manbada aytilishicha, fuqarolar majburiy tartibda Xarkovdan ko‘chirilmoqda. Harbiylar ko‘chirish jarayonini samarali tashkil etishga harakat qilmoqda.
Hozirga qadar Rossiya qo‘shinlari Xarkov viloyatidagi kamida 9 ta aholi punktini egallab olgani maʼlum qilingan. Ushbu hududlardan 5700 nafardan ortiq fuqaro evakuatsiya qilingan.
Mahalliy hokimiyat organlari va ko‘ngillilar kuchli o‘qqa tutilgan qishloqlardan omon qolgan aholini evakuatsiya qilish ustida ish olib borayotgani bildirilgan. Ukrainalik harbiylar esa, o‘q-dorilar taqchilligiga uchrab, hujumga javob berishga qiynalayotgani xabar qilingan.
Viloyat rahbariyati hududda qochqinlar soni ko‘payishi mumkinligini bildirgan. Rossiya hujumlarining ehtimoliy nuqtalaridan fuqarolarni ommaviy ko‘chirishga tayyorgarlik ko‘rilayotgani aytilgan.
Izoh (0)