Rossiya Mudofaa vazirligining kadrlar bosh boshqarmasi boshlig‘i, general-leytenant Yuriy Kuznetsov qo‘lga olindi. Bu haqda huquq-tartibot idoralariga tayanib, “TASS” xabar berdi.
Kuznetsov Rossiya Tergov qo‘mitasining Bosh harbiy tergov boshqarmasi tomonidan tergov qilinmoqda, u jinoiy ish bo‘yicha gumonlanuvchi hisoblanadi. Tergovchilar generalga nisbatan qamoqqa olish tarzidagi ehtiyot chorasini so‘ragan.
Kuznetsov aynan nimada ayblanayotganiga aniqlik kiritilmagan. Uning hibsga olingani hali rasman e’lon qilinmagan. Sud Kuznetsovga nisbatan qanday ehtiyot chorasi qo‘llagani ham noma’lum.
Eslatib o‘tamiz, 23-aprel kuni Rossiya mudofaa vaziri o‘rinbosari Timur Ivanov hibsga olingandi. Tergov qo‘mitasi maʼlumotlariga ko‘ra, mansabdor shaxs yirik miqdorda pora olish maqsadida uchinchi shaxslar bilan til biriktirgan. Ivanovning advokati ayblanuvchi 1 milliard 125 million rubl (taxminan 12 million 285 ming dollar) pora olganlikda ayblanayotgani, Mudofaa vaziri o‘rinbosarining qarindoshlari va ota-onasining mol-mulki xatlovga olinganini aytgan.
Ma’lumot o‘rnida, Rossiya prezidenti Vladimir Putin mudofaa vazirini o‘zgartirmoqda. 11-may kuni Putin amaldagi mudofaa vaziri Sergey Shoyguni ishdan oldi va Rossiya Xavfsizlik kengashi kotibi etib tayinlandi. Uning o‘rnini iqtisodchi Andrey Belousov egallashi kutilmoqda.
Andrey Belousov 1959-yil 17-martda tug‘ilgan, 1981-yilda Moskva davlat universitetining iqtisod fakultetini imtiyozli diplom bilan tamomlagan. U so‘nggi 12 yil davomida iqtisodiyot vaziri, prezident yordamchisi va Bosh vazirning birinchi o‘rinbosari lavozimlarida ishlagan.
Izoh (0)