Turk seriallari dunyo bo‘ylab o‘z muxlislariga ega. Ko‘plab tomoshabinlar “Muhtasham yuz yil”, “Sevgi iztirobi”, “Qora niyat” kabi seriallarni sevib tomosha qilgan, biroq turk kino olamida qiziqarli syujeti bilan muxlislar qalbidan joy olgan komediya yo‘nalishidagi qiziqarli loyihalar ham mavjud. Quyida eng yaxshi turk komedik seriallarini tavsiya qilamiz.
“Har yerdasiz” / “Her Yerde Sen” — 25 qism (2019)
Serialda tasvirlangan Istanbulning go‘zal ko‘chalari, rang-barang manzaralari, dengiz quyoshi va kulgili vaziyatlar ko‘nglingizni ko‘taradi. Syujetga ko‘ra, go‘zal Selin va Demir qonuniy ravishda bir uyni xarid qilgan bo‘lib chiqadi. Bunga ikki keksa opa-singillar sababchi bo‘ladi. Ular umumiy mulki bo‘lgan uyini bir-biriga bildirmay, ikki xaridorga sotib yuboradi. Ularni sudga bermasligi uchun ikki yoshni birlashtirishga harakat qiladi.
Serialda bosh rollarni aktyorlar Furkan Andich va Aybuke Pusat ijro etgan.
“Ko‘r-ko‘rona sevgi” / “Afili Ask” — 38 qism (2019-2020)
Serial premyerasi 2019-yilda, so‘nggi qismi esa 2020-yilning mart oyida chiqarilgan. Har biri taxminan 120 daqiqa davom etgan jami 38 qismdan iborat. Asosiy rollarni Chaglar Ertugrul (Kerem) va Burju Ozberg (Ayshe) ijro etgan.
Bosh qahramonlar tasodifan noxush vaziyatga tushib qoladi, natijada ular shartli ravishda turmush qurishi kerak bo‘ladi. O‘z manfaati va maqsadi uchun o‘tkazilgan to‘y marosimidan so‘ng yoshlar juda ko‘p muammolarga duch keladi.
“Ikki yolg‘onchi” / “Iki yalanchi” — 9 qism (2017)
Ushbu serialda yoshlar ko‘p yolg‘on aralashtirib, o‘zlarini boy qilib ko‘rsatishga urinishining guvohi bo‘lish mumkin. Hayotdagi omadsizliklardan keyin notanish qiz va yigit pul hamma narsani hal qiladi, degan xayolga kelib, badavlatdek ko‘rinishga harakat qiladi. O‘ziga to‘q oila vakillari bilan tanishadi va vaqtini chog‘ o‘tkazib, bir-birini sevib qolganini bilmay qoladi.
Bosh rollarni Keremjem (Serkan) va Yag‘mur Tanrisevsin (Duygu) ijro etgan.
“Sevadi, sevmaydi” / “Seviyor, Sevmiyor” — 28 qism (2016)
Serialda bolalikdan boshlangan sevgi hikoyasi haqida so‘z boradi. Bosh qahramon Denis ismli mehribon, matonatli qiz hayotida doim muvaffaqiyatsizlikka uchraydi. U nima qilsa ham, hech bir ishi o‘xshamaydi.
Bir kuni u ofitsiant bo‘lib ishlagan kafeni janjal bilan tark etadi va yaxshiroq ishga kirishni xohlaydi. Denis 30 yoshda bo‘lsa-da, lekin hayotda biror muhim narsaga erishmagan, turmush ham qurmagandi. U moda jurnaliga intervyuga boradi. U yerda bolaligida birga o‘qigan va ko‘ngil qo‘ygan sinfdoshi — Yigitni ko‘rib qoladi. Semiz, biroz tortinchoq Yigitdan asar ham qolmagan edi, endilikda u kelishgan, o‘z sohasining yaxshi mutaxassisi sifatida ishlaydigan shaxs bo‘lib yetishgandi.
Izoh (0)